अमली पदार्थप्रकरणी तीन उच्चशिक्षित तरुणांना अटक

पुणे, ता. ३ : सिंहगड रस्ता परिसरात अमली पदार्थांची विक्री करणाऱ्या तीन उच्चशिक्षित तरुणांना गुन्हे शाखेच्या अमली पदार्थ विरोधी पथकाने अटक केली. पोलिसांनी त्यांच्या ताब्यातून ओजीकुश गांजा, मेफेड्रोन आणि एलएसडी असा १९ लाख ४५ हजार रुपयांचे अमली पदार्थ जप्त केले आहेत.
अंशुल संतोष मिश्रा (वय २७, रा. बुलडाणा), आर्श उदय व्यास (वय २५, रा. पंतनगर, घाटकोपर पूर्व, मुंबई), पियुष शरद इंगळे (वय २२, रा. चिखली, चिंचवड) अशी अटक केलेल्या संशयितांची नावे आहेत. अंशुल बीए पदवीधर असून आर्श एका विमान कंपनीत नोकरीस होता. पियुषने संगणक अभ्यासक्रम पूर्ण केला आहे. हे तिघेजण त्यांच्या ग्रुपमधील काही तरुणांना अमली पदार्थ विक्री करीत होते.
अमली पदार्थ विरोधी पथकाचे पोलिस निरीक्षक सुदर्शन गायकवाड, पोलिस निरीक्षक उल्हास कदम पथकातील कर्मचाऱ्यांसह सिंहगड रस्ता परिसरात गस्तीवर होते. त्यावेळी नऱ्हे भागातील भूमकर चौकात तिघेजण अमली पदार्थाच्या विक्रीसाठी येणार असल्याची माहिती पोलिस अंमलदार संदीप शिर्के यांना मिळाली. त्यानुसार पोलिसांनी सापळा रचून तिघा तरुणांना ताब्यात घेतले. त्यांची झडती घेतली असता २५१ ग्रॅम ओजीकुश गांजा, १५ ग्रॅम मेफेड्रोन आणि ६२ मिलिग्रॅम एलएसडी अमली पदार्थ आढळून आले.
पोलिस आयुक्त अमितेश कुमार, पोलिस सह आयुक्त रंजनकुमार शर्मा, अतिरिक्त आयुक्त शैलेश बलकवडे, पोलिस उपायुक्त निखिल पिंगळे, सहाय्यक आयुक्त गणेश इंगळे यांच्या मार्गदर्शनाखाली अमली विरोधी पथकाचे सहाय्यक निरीक्षक अनिकेत पोटे, उपनिरीक्षक दिगंबर कोकाटे, पोलिस अंमलदार सचिन माळवे, विनायक साळवे, प्रवीण उतेकर, संदेश काकडे, दत्ताराम जाधव, सुजित वाडेकर, नूतन वारे, रेहाना शेख, विपुल गायकवाड यांनी ही कारवाई केली.