जातीच्या दाखल्यासाठी अंमलबजावणीची मागणी

पुणे, ता. ७ : समता बेलदार समाज संस्था व सकल बेलदार समाज संघटना महाराष्ट्र राज्य यांच्यातर्फे बेलदार समाजाच्या पदाधिकाऱ्यांनी जातीच्या दाखल्यासाठी जिल्हाधिकारी डॉ. सुहास दिवसे यांना भेटून निवेदन दिले.
बेलदार समाज हा महाराष्ट्रामध्ये ‘एनटी’ व केंद्र सरकारमध्ये ओबीसी प्रवर्गात समाविष्ट करण्यात आला आहे. हे दोन्ही दाखले मिळवण्यासाठी काही कागदपत्रे पुराव्यासाठी सादर करावी लागतात. मूळ पुराव्याअभावी अनंत अडचणींचा सामना करावा लागत आहे. यामुळे मुलांना शालेय शिक्षण सोडावे लागत आहे तर अनेकांची या मुळे नोकरी गेली आहे, अशी बाजू मांडली. जिल्हाधिकारी डॉ. दिवसे यांनी जातीच्या दाखल्यासाठीची अंमलबजावणी लवकरात लवकर होईल, असे आश्वासन दिले. मागणी पूर्ण न झाल्‍यास आंदोलन करण्याचा इशारा यावेळी संघटनांतर्फे देण्यात आला. यावेळी समता बेलदार समाज संस्थेचे अध्यक्ष व सकल बेलदार समाज संघटना युवा मोर्चा महाराष्ट्र राज्याचे अध्यक्ष डॉक्टर विशाल साळुंखे आदी उपस्थित होते.