दोन माजी आमदारांनी घेतली पवारांची भेट

दोन माजी आमदारांनी घेतली पवारांची भेट

पुणे, ता. ६ ः आगामी विधानसभा निवडणुकीच्या दृष्टीने शहरातील राजकीय घडामोडींना वेग आला आहे. शिवसेना (उद्धव बाळासाहेब ठाकरे) पक्षाचे दोन माजी आमदार चंद्रकांत मोकाटे, महादेव बाबर यांनी शनिवारी (ता. ६) ज्येष्ठ नेते शरद पवार यांची भेट घेतल्याने चर्चेला उधाण आले. या दोन्ही माजी आमदारांनी विधानसभा निवडणूक लढविण्याची इच्छा माध्यमांशी बोलताना व्यक्त केली.
काँग्रेस, राष्ट्रवादी काँग्रेस शरदचंद्र पवार पक्ष आणि शिवसेना (उद्धव बाळासाहेब ठाकरे) या तिन्ही पक्षांची लोकसभा निवडणुकीमध्ये महाविकास आघाडी होती. त्याचप्रमाणे विधानसभा निवडणुकीलाही आघाडी कायम राहणार असल्याचे आघाडीच्या नेत्यांनी यापूर्वीच स्पष्ट केले आहे. पुणे शहरात विधानसभेचे आठ विधानसभा मतदारसंघ आहेत. त्यातील दोन विधानसभा मतदारसंघ राष्ट्रवादी काँग्रेसकडे, पाच ठिकाणी भाजपचे तर एका ठिकाणी काँग्रेसचा आमदार आहे. आगामी निवडणुकीच्या जागा वाटपात काँग्रेस आणि शरद पवार यांच्या राष्ट्रवादीला प्रत्येकी तीन, तर ठाकरे गटाच्या वाट्याला दोन जागा येतील, अशी चर्चा पदाधिकाऱ्यांमध्ये सुरु आहे. कोथरूडची जागा ठाकरे गटाला जाणार हे जवळपास निश्‍चित आहे. हडपसर येथे शरद पवार गट आणि ठाकरे गटात रस्सीखेच असणार आहे. त्या पार्श्‍वभूमीवर मोकाटे, बाबर यांनी शरद पवार यांची भेट घेतल्याने त्यास महत्वप्राप्त झाले आहे.

बारामती लोकसभा मतदारसंघात चांगले काम केल्यामुळे साहेबांनी भेटायला बोलावले होते. कोथरूड विधानसभा मतदारसंघात महाविकास आघाडीची ताकद जास्त आहे. तेथून मी निवडणूक लढविण्यास इच्छुक आहे. सर्वजण ताकदीने काम करतील.
चंद्रकांत मोकाटे, माजी आमदार

विधानसभा निवडणुकीसाठी आम्ही तयार आहोत. जागा वाटपात हडपसरची जागा कोणाकडे असणार, हे निश्चित झाले नसले, तरी ही जागा आमच्याकडे असावी, असे वाटते. अन्य कोणी निवडणुकीसाठी इच्छुक असेल, तर ते चुकीचे नाही. जो कोणी महाविकास आघाडीचा उमेदवार असेल, त्यास निवडून आणले जाईल.
महादेव बाबर, माजी आमदार

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com