हौशी ३२ महिलांच्या चित्रांचे आजपासून प्रदर्शन

पुणे, ता. ३ ः विविध विषयांवरील हौशी ३२ चित्रकार महिलांनी रेखाटलेल्या चित्रांचे प्रदर्शन कोथरूडमधील यशवंतराव चव्हाण नाट्यगृहाच्या कलादालनात शुक्रवार (ता. ४), शनिवार (५) आणि रविवारी (ता. ६) आयोजित करण्यात आले आहे. उद्‍घाटन शुक्रवारी (ता. ४) सकाळी ११ वाजता होणार असून त्या प्रसंगी पाहुण्या म्हणून एव्हरेस्ट सर केलेल्या सुविधा कडलग उपस्थित राहणार आहेत.
सकाळी चालण्याचा व्यायाम करणाऱ्यांचा फेसबुकवर ‘वॉक इट आउट, टॉक इट आउट हा ग्रुप आहे. त्यावर राज्यातून २२ हजारांपेक्षा अधिक व्यायामप्रेमी आहेत. या ग्रुपतर्फे या प्रदर्शनाचे आयोजन करण्यात आले आहे. हे प्रदर्शन सकाळी १० ते रात्री ९ दरम्यान सर्वांसाठी खुले आहे. या प्रदर्शनातील चित्रांच्या विक्रीतून जमा होणारा निधी सामाजिक कार्यासाठी वापरण्यात येणार आहे. प्रदर्शनात विविध प्रकारच्या २५० हून अधिक चित्रांचा समावेश असेल. या प्रसंगी मान्यवर चित्रकारांचे थेट प्रात्यक्षिकही (लाइव्ह डेमो) होईल. चित्रकार महिलांना प्रोत्साहन मिळावे, यासाठी विविध पारितोषिकेही देण्यात येणार आहेत. ‘वॉक इट आउट, टॉक इट आउट ग्रुपच्या संस्थापक नेहा येवले तसेच शिल्पा चुरी, श्रुती सहस्रबुद्धे, रेश्मा बुरसे, जयंत इनामदार, संदीप नहार, सुधीर शिंदे आदींनी प्रदर्शनाचे संयोजन केले आहे.