सारसबागेजवळील महालक्ष्मी मंदिरात नवरात्रोत्सव सुरू

कात्रज, ता. ३ : सारसबागेजवळील महालक्ष्मी मंदिरात धार्मिकतेला सामाजिकतेची जोड देणारा समाजातील सर्व घटकांना सामावून घेणारा सार्वजनिक नवरात्रोत्सव दरवर्षीप्रमाणे यंदाही उत्साहात साजरा होत आहे. श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्टच्या वतीने हा उत्सव आयोजित करण्यात आला आहे. उत्सवाचा प्रारंभ शहराचे पोलिस आयुक्त अमितेश कुमार यांच्या हस्ते घटस्थापनेने शुक्रवारी (ता. ३) सकाळी साडेआठ वाजता करण्यात आला. या वेळी ट्रस्टचे प्रमुख संस्थापक विश्‍वस्त राजकुमार अग्रवाल, अमिता अग्रवाल, विश्‍वस्त अॅड. प्रताप परदेशी, तृप्ती अग्रवाल, भरत अग्रवाल, प्रवीण चोरबेले हेमंत अर्नाळकर आदी उपस्थित उपस्थित होते.
नवरात्रोत्सवानिमित्त पहिल्या दिवशी तीन ते चार या वेळेत गृहलक्ष्मी श्री सूक्त मंडळाकडून भजन करण्यात आले, तर चार ते पाच या वेळेत प्रतिभा मेंढेकर भजनी मंडळाकडून भजन करण्यात आले. रुद्रगर्जना पथकाकडून वादन, शंखनाद करण्यात आला. संध्याकाळी साडेसहा वाजण्याच्या सुमारास विद्युत रोषणाईचे उद्‌घाटन सह पोलिस आयुक्त रंजन शर्मा यांच्या हस्ते करण्यात आले. रात्री साडेआठच्या सुमारास राधिका पारकर अँड ग्रुपच्या वतीने महिला सक्षमीकरणावर सादरीकरण करण्यात आले.