‘बुक्स फॉर रूरल इंडिया’ पदयात्रेचे आज प्रस्थान

पुणे, ता. ४ : देशाच्या ग्रामीण भागातील युवकांमध्ये वाचनाबद्दल जागरूकता निर्माण करण्यासाठी ‘ज्ञान की लायब्ररी’ , ‘अरहम फाउंडेशन आणि ‘बुक्स फॉर रूरल एरियाज ऑफ व्हिएतनाम’ यांच्यातर्फे ‘बुक्स फॉर रूरल इंडिया’ या पदयात्रेचे आयोजन करण्यात आले आहे. पुणे ते मुंबई अशा पदयात्रेचे तळेगाव दाभाडेवरून उद्या (ता. ५) प्रस्थान होणार आहे.
देशाच्या ग्रामीण भागात ८० लाख ग्रंथालये उभारण्याचे या उपक्रमाचे उद्दिष्ट आहे. संवेदनशील युवक घडविण्यासाठी मूळचे व्हिएतनामचे असणारे युनेस्को पुरस्कार विजेते गुयेन क्वांग थाच हे देशातील २९ राज्यांमधून सुमारे ३००० किलोमीटर अंतराची पदयात्रा काढणार आहेत. महात्मा गांधी यांच्या विचारांनी प्रभावित झालेल्या थाच यांनी व्हिएतनाममध्ये ‘बुक्स फॉर रूरल एरियाज ऑफ व्हिएतनाम’ हा उपक्रम राबवला. या उपक्रमाद्वारे जी वाचन क्रांती त्यांनी व्हिएतनाममध्ये घडवून आणली त्याची संपूर्ण जगाने दखल घेतली. भारतामध्ये देखील थाच यांना अशीच क्रांती अभिप्रेत आहे. ही पदयात्रा मुंबईत १६ ऑक्टोबर रोजी चर्चगेट मधील महात्मा गांधी पुतळा येथे दाखल होईल.
-------------