विस्तारित मेट्रो प्रकल्पासाठी आर्थिक तांत्रिक सल्लागाराची नियुक्ती

पुणे, ता. ६ : शिवाजीनगर ते लोणी काळभोर आणि खडकवासला ते खराडीदरम्यानचा विस्तारित मेट्रो प्रकल्प ‘खासगी भागीदारी तत्त्वावर’ (पीपीपी) की ‘ठेकेदाराची नेमणूक करून’ (ईपीसी) राबविणे योग्य आहे, याची तपासणी करण्यासाठी पुणे महानगर क्षेत्र विकास प्राधिकरणाकडून (पीएमआरडीए) आर्थिक तांत्रिक सल्लागार नेमण्यात आला आहे. सल्लागाराकडून तीन महिन्यांत अहवाल प्राप्त झाल्यानंतर या संदर्भातील निर्णय घेतला जाणार असल्याची माहिती ‘पीएमआरडीए’च्या अधिकाऱ्यांनी दिली.
विभागीय आयुक्त सौरभ राव यांच्या अध्यक्षतेखाली यावर निर्णय घेण्यासाठी पुणे युनिफाइड अर्बन ट्रान्स्पोर्ट ॲथॉरिटीची (पुमटा) बैठक झाली. बैठकीला पुलगेट ते हडपसरदरम्यान आठ किलोमीटर मार्गाचा तांत्रिक व आर्थिक अहवाल पीएमआरडीए आणि महामेट्रोने स्वतंत्रपणे तयार करावा. त्यात आर्थिकदृष्ट्या कोणाचा प्रकल्प व्यवहार्य आहे. कोणी त्या मार्गाचे काम करावे, यावर निर्णय घेण्यात यावा, असे ठरले होते.
त्यानुसार शिवाजीनगर ते लोणी काळभोर व खडकवासला ते खराडीदरम्यान मेट्रोचे विस्तारीकरण कोणत्या पद्धतीने करणे योग्य होईल, याबाबत निर्णय घेण्यासाठी ‘पीएमआरडीए’ने आर्थिक तांत्रिक सल्लागार नेमावा, अशा सूचना ‘पुमटा’ने दिल्या आहेत. त्यानुसार निविदा प्रक्रिया राबवून सल्लागाराची नेमणूक करण्या आली, असे ‘पीएमआरडीए’कडून सांगण्यात आले.

असे आहेत मार्ग
- खडकवासला- स्वारगेट- पुलगेट- हडपसर फाटा (मगरपट्टा सिटी) ते खराडी हा सुमारे २८ किलोमीटर लांबीचा मेट्रोमार्ग महामेट्रोने प्रस्तावित केला आहे.
- शिवाजीनगर-पुलगेट- हडपसर ते लोणी काळभोर हा १९ किलोमीटरचा मार्ग ‘पीएमआरडीए’ने प्रस्तावित केला आहे.

निविदा प्रक्रिया पूर्ण करून सल्लागार नियुक्त करण्यात आला आहे. तीन महिन्यांत याचा अहवाल प्राप्त झाल्यानंतर पुढील निर्णय घेण्यात येईल.
- राहुल महिवाला, आयुक्त, पीएमआरडीए