अंदाजपत्रक सादर न करणे ही विश्‍वस्तांची अकार्यक्षमता

पुणे, ता. २६ : महाराष्ट्र सार्वजनिक विश्‍वस्त व्यवस्था कायद्यानुसार नोंदणी झालेले ट्रस्ट व धर्मादाय संस्थांनी पुढील आर्थिक वर्षाचे प्रस्तावित उत्पन्न व खर्च दर्शविणारे अंदाजपत्रक सादर करणे आवश्यक आहे. अंदाजपत्रक सादर न केल्यास वार्षिक लेखा परिक्षण अहवाल (ऑडिट) मध्ये तशी नोंद केली जाते. अशी नोंद विश्‍वस्तांची अकार्यक्षमता म्हणून समजली जाऊ शकते, अशी माहिती पब्लिक ट्रस्ट प्रॅक्टिशनर्स असोसिएशनचे माजी अध्यक्ष अ‍ॅड. शिवराज कदम जहागीरदार यांनी दिली.
धर्मादाय नियम १९५१ मधील ‘नियम १६ अ’ प्रमाणे ज्या धार्मिक ट्रस्टचे वार्षिक उत्पन्न पाच हजार रुपयांपेक्षा जास्त व इतर धर्मादाय संस्थांचे दहा हजार रुपयांपेक्षा अधिक असेल, त्यांना असे बजेट सादर करावे लागेल. या अंदाजपत्रकात १ एप्रिलपासून सुरू होणाऱ्या संपूर्ण आर्थिक वर्षामध्ये संस्थेच्या मालमत्तेमध्ये होणारी वाढ, विक्रीद्वारे येणारी रक्कम, उद्दिष्टनिहाय तसेच प्रशासकीय खर्चासाठीची तरतूद, संस्थेचे काही विशेष उपक्रम सुरू होणार असतील, तर त्यासाठीचे आर्थिक नियोजन, संस्थेची देणी, कर्जफेड अशा नियोजनाची माहिती देणे गरजेचे आहे. त्याचप्रमाणे ट्रस्टच्या नावे बँकेमधील मुदत ठेवी व त्यावर मिळणारे व्याज, इतर गुंतवणूक व त्यावरील परतावा, खासगी देणग्या, सीएसआर प्रकल्प, शासकीय अनुदान अशा सर्व उत्पन्न स्त्रोतांची माहिती अंदाजपत्रकात नमूद करावी लागते. सर्व ट्रस्ट व धर्मादाय संस्थांनी आपल्या सनदी लेखापालाशी संपर्क करून अंदाजपत्रक वेळेत दाखल करणे आवश्यक असल्याचेही ॲड. कदम जहागीरदार यांनी नमूद केले.