पुण्यातील मतदान केंद्रांचा जिल्हाधिकाऱ्यांकडून आढावा

पुणे, ता. १२ : गेल्या दोन दिवसांपासून शहरात सुरू असलेल्या वळवाच्या पावसाच्या पार्श्वभूमीवर शहरातील विविध मतदारसंघातील साहित्य वितरण केंद्र आणि मतदान केंद्रांना भेट देऊन तेथील व्यवस्थेचा आढावा निवडणूक निर्णय अधिकारी डॉ. सुहास दिवसे यांनी रविवारी घेतला.

पुणे लोकसभा मतदारसंघातील लोकसभा निवडणूकीसाठी सोमवारी (ता. १३) मतदान होत आहे. त्या पार्श्वभूमीवर रविवारी सकाळपासूनच निवडणूक निर्णय अधिकारी तथा जिल्हाधिकारी डॉ. दिवसे यांनी मतदान साहित्य वितरण केंद्राला भेट देऊन आढावा घेत होते. या भेटी दरम्यान डॉ. दिवसे यांनी संबंधित मतदारसंघाचे सहाय्यक निवडणूक निर्णय अधिकारी यांच्याकडून साहित्य वितरण करण्यासाठी केलेले नियोजन आणि मतदान केंद्रांवरील व्यवस्थेची माहिती घेतली. साहित्य वितरण प्रक्रिया वेळेत आणि शांततेत पार पाडावी, अशा सूचनाही त्यांनी संबंधितांना दिल्या. पावसाची शक्यता लक्षात घेता ईव्हीएमच्या सुरक्षेबाबतही त्यांनी सूचना दिल्या. पोलिस अधिकाऱ्यांशीदेखील सुरक्षा व्यवस्थेबाबत चर्चा केली. शहराच्या मध्यवर्ती भागात मतदान केंद्र परिसरातील वाहनतळ व्यवस्थेचीही त्यांनी माहिती घेतली.