कोटा शहरात एलनचा माजी विद्यार्थी मेळावा उत्साहात

कोटा, ता. १३ : एलन करिअर इन्स्टिट्यूटच्या माजी विद्यार्थ्यांचा मेळावा नुकताच पार पडला. देशातील सुमारे एक हजार डॉक्टर कोटा शहरात दाखल झाले होते. वेगवेगळ्या वर्षी एलन इन्स्टिट्यूटमध्ये शिकलेले माजी विद्यार्थी या दोन दिवसीय ‘एलन एल्युमिनाई मीट’मध्ये सहभागी झाले होते.
सामाजिक क्षेत्रात विशेष कार्य करणाऱ्या माजी विद्यार्थ्यांना यावेळी सन्मानित करण्यात आले. कार्यक्रमाला प्रमुख पाहूणे म्हणून लोकसभेचे अध्यक्ष ओम बिर्ला, तसेच एलन परिवाराच्या मातोश्री कृष्णादेवी मानधना, संचालक डॉ. गोविंद माहेश्वरी, राजेश माहेश्वरी, नवीन माहेश्वरी, डॉ. बृजेश माहेश्वरी, विभागप्रमुख के. जी. वैष्णव व पी. बी. सक्सेना उपस्थित होते. यावेळी एलनच्या विद्यार्थ्यांना ‘एलन परिवार स्कॉलरशीप’ची घोषणा करण्यात आली.
बिर्ला म्हणाले, ‘‘कोटाचे प्रतिनिधित्व करत असल्याचा मला अभिमान आहे. कारण जगभरात फिरत असताना कोटामधून शिक्षण घेणारे विद्यार्थी भेटतात. शिक्षणासाठी कोटा शहर उत्तम असून, येथील शिक्षणाची पद्धत आणि सुविधा उत्कृष्ट आहे. म्हणूनच येथे दरवर्षी लाखो विद्यार्थी शिकायला येता. एलन इन्स्टिट्यूटचे यात विशेष योगदान आहे.’’
‘संस्कार से सफलता तक’ हे ध्येयवाक्य घेऊन आम्ही कार्यरत असल्याचे डॉ. गोविंद माहेश्वरी यांनी सांगितले. शिक्षणाबरोबरच संस्कार देणे ही आमची प्राथमिकता आहे. म्हणूनच आज एलन इन्स्टिट्यूट एक परिवार म्हणून उदयास आली आहे, असेही ते म्हणाले. माजी विद्यार्थ्यांना बदललेले कोटा शहर दाखविण्यासाठी एलनचा प्रयत्न असल्याचे राजेश माहेश्वरी यांनी सांगितले.