अखिल गोंधळी संघटनेतर्फे संबळ वादन वर्गाचे उद्‍घाटन

पुणे, ता. १३ : अखिल भारतीय गोंधळी समाज संघटना तसेच गोंधळी व भटक्या विमुक्त जाती-जमाती विकास संघ यांच्या वतीने सुरु केलेल्या गोंधळ कला संबळ वादन प्रशिक्षण वर्गाचे उद्‍घाटन वाद्यपूजनाने करण्यात आले. शाहीर हेमंतराज मावळे यांच्या हस्ते रविवारी (ता. १२) उद्‍घाटन झाले. या वेळी प्रमुख पाहुणे म्हणून जेजुरी देवस्थान ट्रस्टचे विश्वस्त डॉ. राजेंद्र खेडकर व श्री खंडोबा देवता व लिंग कडेपठार ट्रस्टचे विश्र्वस्त मंगेश जेजुरीकर उपस्थित होते.
शाहीर मावळे यांनी तानाजी मालुसरे यांचा पोवाडा सादर केला. पोवाड्यातून गोंधळ कलेचे महत्त्व सांगितले. याप्रसंगी लकडीपूल विठ्ठल मंदिराचे विश्र्वस्त दीपक थोरात, श्री पासोड्या विठ्ठल मंदिराचे विश्र्वस्त रवींद्र पठाले, वारकरी सेवा संघ, आळंदीचे विश्र्वस्त हेमंत निरवळ, नागनाथपार सार्वजनिक गणेशोत्सव मंडळ ट्रस्टचे प्रतीक केदारी आदी उपस्थित होते. एरंडवणे येथील दीनानाथ मंगेश रुग्णालयाजवळील पटवर्धन बाग येथे असलेल्या संघटनेच्या मध्यवर्ती कार्यालयात २६ मे पर्यंत संबळ वादन प्रशिक्षण वर्ग मोफत असणार आहे, असे संघटनेचे अध्यक्ष परेश गरुड यांनी सांगितले. कार्यक्रमाचे सूत्रसंचालन ॲड. मुकुंद यदमाळ यांनी केले.