महात्मा फुले पेठमध्ये तरुणाची आत्महत्या

पुणे, ता. १५ : व्याजाने दिलेल्या पैशांत हॉटेल व्यवसायात भागीदारी देण्याचा तगादा लावल्याने तरुणाने आत्महत्या केल्याची घटना महात्मा फुले पेठ परिसरात घडली. या प्रकरणी खडक पोलिस ठाण्यात एकाविरुद्ध गुन्हा दाखल केला.
शिवराज विजयकुमार वडलकोंडा (रा. महात्मा फुले पेठ) असे आत्महत्या केलेल्या तरुणाचे नाव आहे. या प्रकरणी स्नेहल वडलकोंडा यांनी खडक पोलिस ठाण्यात फिर्याद दिली. त्यावरून रोहित सुभाष भोंडे (वय ५४, रा. महात्मा फुले पेठ) या संशयिताविरुद्ध गुन्हा दाखल झाला. शिवराजने हॉटेल सुरू करण्यासाठी भोंडेकडून पाच लाख रुपये व्याजाने घेतले होते. त्यानंतर भोंडेने हॉटेलमध्ये ५० टक्के भागीदारी देण्यासाठी शिवराजकडे तगादा लावला. त्यावर विचार करण्यासाठी शिवराजने काही दिवसांची मुदत मागितली. परंतु भोंडेने शिवराजच्या परस्पर हॉटेलमधील साहित्याची विक्री केली. त्यातून आलेली रक्कम शिवराजला न देता त्रास देऊन आत्महत्येस प्रवृत्त केले, असे फिर्यादीत म्हटले आहे.