व्यवस्थापकाकडून कंपनीची ९७ लाखांची फसवणूक

पुणे, ता. १६ ः खासगी वित्त संस्थेत सहाय्यक वित्त व्यवस्थापक म्हणून कार्यरत असलेल्या पदाधिकाऱ्याने कंपनीच्या बँक खात्यातील ९७ लाख २३ हजार ८८७ रुपये ओळखीच्या व्यक्तींच्या नावावर पाठवत कंपनीची फसवणूक केल्याचा प्रकार समोर आला आहे.

या प्रकरणी योगेश सुरेश दीपंकर (वय ४२, रा. पिंपरी चिंचवड) यांनी चतुःशृंगी पोलिस ठाण्यात फिर्याद दिली आहे. त्यानुसार विकास सिंग (वय ३१, रा. अरुण निहार कॉलनी, जोटवारा रस्ता, जयपूर) या व्यवस्थापकावर गुन्हा दाखल करण्यात आला आहे. फसवणुकीचा हा प्रकार १ जानेवारी ते १५ मे दरम्यान बाणेर येथील अमर मधुबन टेक पार्कमध्ये घडला आहे. पोलिसांनी दिलेल्या माहितीनुसार, सिंग हा फिर्यादी योगेश दीपंकर यांच्या कंपनीत सहाय्यक वित्त व्यवस्थापक आहे. सिंगला कंपनीच्यावतीने पैशाचे व्यवहार करण्याचे अधिकार दिले आहेत. त्याने कंपनीच्या संचालकांना कुठलीही कल्पना न देता, तसेच परवानगी न घेता ९७ लाख २३ हजार ८८७ रुपये हे ओळखीच्या व्यक्तींना परस्पर पाठवून कंपनीची फसवणूक केल्याचे फिर्यादीत नमूद केले आहे.