शिवराज्याभिषेक पालखी सोहळ्याचे शिवनेरीवरून प्रस्थान

पुणे, ता. ३ : आम्ही मावळे प्रतिष्ठान, महाराष्ट्र यांच्यावतीने किल्ले शिवनेरी ते किल्ले राजगड असा छत्रपती शिवाजी महाराज शिवराज्याभिषेक पालखी सोहळा आयोजित करण्यात आला आहे. या शिवराज्याभिषेक पालखी सोहळ्याचे हे अकरावे वर्षे आहे.
शिवनेरी येथून सोमवारी (ता. ३) सकाळी ५१ तुतारींनी सलामी देऊन, मशाल पेटवून आई शिवाई मातेचा अभिषेक व खणा-नारळाने ओटी भरून ढोल-ताशांच्या गजरात शिवराज्याभिषेक सोहळ्याला सुरुवात झाली. दुपारी शंखनाद करीत लालमहाल येथे पालखीचे प्रस्थान झाले. लाल महाल येथे ३५० महिलांच्या हातून पालखीचे औक्षण व आरती करण्यात आली. या वेळी इतिहास अभ्यासक प्रा. गणेश राऊत यांनी शिवव्याख्यान सादर केले. पुढील एक दिवस पालखी लाल महाल येथे मुक्कामी असून, बुधवारी (ता. ५) सकाळी लालमहाल येथून ढोल-ताशांच्या गजरात पालखीचे प्रस्थान राजगडाच्या दिशेने खंडोबाचा माळ (पाल खुर्द) येथे होईल. खंडोबाचा माळ येथे समस्त पाल ग्रामस्थ पालखी खांद्यावर घेऊन महाराणी सईबाईसाहेब यांच्या स्मृतिस्थळाला भेट देतील. या वेळी राजगड पायथ्याला जागर कार्यक्रमात शिवव्याख्यान, सोपानमहाराज कनेरकर यांचे समाजप्रबोधन कीर्तन, मर्दानी खेळ, नाथसेवेकरी ओंकार दिनेश गायन मंडळ, मावळ यांचा जुगलबंदी व मावळ भागातील पारंपरिक ढोल-ताशांवरील नृत्य, तसेच सप्तशृंगी महिला भजनी मंडळाचे भजन आणि महिलांचे पारंपरिक खेळ होतील. गुरुवारी (ता. ६) ५१ तुतारींची सलामी, ढोल-ताशांच्या गजरात पाली दरवाजाच्या मार्गाने राजगडावर पद्मावती माची येथे आई पद्मावती माता दर्शन घेऊन पालखी किल्ल्यावर दाखल होईल. सदरेवर भव्यदिव्य शिवराज्याभिषेक सोहळा साजरा करण्यात येईल. शिवराज्याभिषेक सोहळा महाराष्ट्रातील प्रत्येक गड-किल्ल्यावर साजरा व्हावा, यासाठी ‘आम्ही मावळे प्रतिष्ठान’ प्रयत्न करत आहे. सर्व शिवप्रेमींनी या सोहळ्यास उपस्थित राहावे, असे आवाहन प्रतिष्ठानचे पराग मते, राज देशमुख आणि अनिकेत घुले यांनी केले आहे.

गुणवंतांना ऑस्ट्रेलियात शिक्षणासाठी शिष्यवृत्ती
‘आम्ही मावळे प्रतिष्ठान’ अनेक वर्षे गड-किल्ल्यांवर दिवाळी साजरी करण्यासह आपत्तीमध्ये गड-किल्ल्यांवर मदतकार्य राबविण्यासाठी अग्रेसर असते. यावर्षीपासून राजगड परिसरातील गुणवंत मुलांना ऑस्ट्रेलिया देशात शिक्षणासाठी शिष्यवृत्ती देण्याची जबाबदारी प्रतिष्ठानने उचलली आहे.