विभागीय आयुक्तांची मतमोजणी केंद्रांना भेट

पुणे, ता. ३ : कोरेगाव पार्क येथील भारतीय अन्न महामंडळाच्या गोदामातील पुणे व बारामती लोकसभा मतदारसंघ मतमोजणी केंद्र, बालेवाडी येथील शिवछत्रपती क्रीडा संकुल वेटलिफ्टींग हॉलमधील मावळ लोकसभा मतदारसंघ मतमोजणी केंद्र आणि रांजणगाव (कारेगाव) येथील महाराष्ट्र औद्योगिक वखार महामंडळाच्या गोदामातील शिरूर लोकसभा मतदारसंघाच्या मतमोजणी केंद्रास विभागीय आयुक्त डॉ. चंद्रकांत पुलकुंडवार यांनी सोमवारी (ता. ३) भेट देऊन पाहणी केली.
या वेळी मावळचे निवडणूक निर्णय अधिकारी दीपक सिंगला, बारामती निवडणूक निर्णय अधिकारी कविता द्विवेदी, शिरूरचे निवडणूक निर्णय अधिकारी अजय मोरे, उपायुक्त वर्षा लढ्ढा-उंटवाल, उपजिल्हा निवडणूक अधिकारी मीनल कळसकर आदी उपस्थित होते.
विधानसभा मतदारसंघनिहाय मतमोजणी कक्ष, सीसीटीव्ही यंत्रणा, निवडणूक निरीक्षक, उमेदवार आणि उमेदवारांचे निवडणूक प्रतिनिधी तसेच माध्यम प्रतिनिधींसाठी माध्यम कक्षात करण्यात आलेल्या व्यवस्थेची विभागीय आयुक्त पुलकुंडवार यांनी पाहणी केली.
या वेळी निवडणूक निर्णय अधिकारी यांनी मतमोजणी केंद्रातील केलेल्या तयारीची तसेच व्यवस्थेबद्दलची सविस्तर माहिती दिली.