पावसाळापूर्व नालेसफाई करण्याची पुण्यात मागणी

पुणे, ता. ३ : पावसाळ्याच्या पार्श्‍वभूमीवर महापालिकेने शहरातील सर्व नाल्यांची साफसफाई, पावसाळी गटारांमधील गाळ काढणे व खड्डे तातडीने बुजवून घ्यावेत, अशी मागणी राष्ट्रवादी काँग्रेसचे शहराध्यक्ष दीपक मानकर यांनी आयुक्तांकडे केली आहे. मानकर यांनी महापालिका आयुक्त डॉ. राजेंद्र भोसले यांची भेट घेतली. त्यावेळी त्यांनी मागण्यांचे निवेदन भोसले यांच्याकडे दिले. यावेळी आमदार चेतन तुपे, सुभाष जगताप, सदानंद शेट्टी, गौरी जाधव आदी उपस्थित होते. पावसाळ्यामध्ये अनेक भागांत पाणी साचणे, खड्डे पडून अपघात होणे, साचलेल्या पाण्यामुळे डेंगी, मलेरिया, हिवताप यांसारखे आजार होऊ नयेत यादृष्टीने आरोग्य विभागाने सतर्क राहणे, याबरोबरच नाल्यांची सफाई होणे गरजेचे आहे, खड्ड्यांची तातडीने दुरुस्ती झाली पाहिजे, झाडांच्या धोकादायक फांद्या छाटणे आदी आवश्‍यक उपाययोजना कराव्यात, असे त्यांनी नमूद केले आहे.