अपघातग्रस्त महिलेचा उपचारादरम्यान मृत्यू

पुणे, ता. ६ : भरधाव वाहनाच्या धडकेत गंभीर जखमी झालेल्या पादचारी ज्येष्ठ महिलेचा उपचारादरम्यान मृत्यू झाला. हा अपघात १४ फेब्रुवारीला सकाळी साडेअकराच्या सुमारास हडपसर गाडीतळ परिसरात घडला होता. सखूबाई वामन वेदपाठक (वय ७७, रा. वेताळबाबा वसाहत, हडपसर) असे मृत महिलेचे नाव आहे. या प्रकरणी हडपसर पोलिसांनी मोटार वाहन कायद्यानुसार वाहन चालकावर गुन्हा दाखल केला आहे. पोलिसांनी दिलेल्या माहितीनुसार, सखूबाई १४ फेब्रुवारीला सकाळी साडेअकराच्या सुमारास हडपसर गाडीतळ परिसरातून पायी चालल्या असताना भरधाव वाहनाने त्यांना धडक दिली. त्यामुळे गंभीर जखमी झालेल्या सखूबाईंना रूग्णालयात दाखल करण्यात आले. उपचारादरम्यान त्यांचा मृत्यू झाला. पोलिस उपनिरीक्षक हसन मुलाणी या गुन्ह्याचा तपास करत आहेत.