सुरेंद्रकुमार अग्रवाल यांची उच्च न्यायालयात धाव

पुणे, ता. ६ ः कल्याणीनगर अपघात प्रकरणातील अल्पवयीन मुलाचे आजोब सुरेंद्रकुमार अग्रवाल यांनी अटकेबाबत उच्च न्यायालयाचा दरवाजा ठोठावला आहे. आपल्याला झालेली अटक चुकीची आहे, अशी याचिका त्यांनी दाखल केली आहे. पोलिसांनी चुकीच्या पद्धतीने अटक केली असून, केवळ आरोपांच्या आधारे चुकीच्या पद्धतीने गुन्ह्यात अडकविण्यात आले आहे. तसेच कारवाईदरम्यान, ताब्यात घेताना फौजदारी प्रक्रिया संहितेमध्ये नमूद केलेल्या तरतुदींचे पालन केले जात नसल्याची माहिती सुरेंद्रकुमार अगरवाल यांनी याचिकेद्वारे न्यायालयाला दिली आहे. अ‍ॅड. आशुतोष श्रीवास्तव यांच्यामार्फत मुंबई उच्च न्यायालयात याचिका दाखल करण्यात आली आहे.
पुणे पोलिसांच्या गुन्हे शाखेने २५ मे रोजी अग्रवाल यांना ताब्यात घेतले होते. त्याच दिवशी येरवडा पोलिस ठाण्यात स्वतंत्र गुन्हा दाखल करण्यात आला. पोलिसांनी अटक करण्यापूर्वी नोटीस देणे आवश्यक होते. मात्र ती दिलेली नाही, असे याचिकेत नमूद केलेले आहे.