हडपसरमधून मोटारी चोरणाऱ्यास अटक

पुणे, ता. ४ : हडपसर येथील दुकानातून सुमारे १० लाख रुपये किमतीच्या दोन मोटारी चोरुन नेणाऱ्यास पोलिसांनी अटक केली. तर, त्याचा साथीदार असलेल्या एका अल्पवयीन मुलाला ताब्यात घेतले आहे.
पवन शंकर अलकुंटे (वय २०, रा. अलकुंटेवस्ती, हडपसर) असे अटक केलेल्या संशयिताचे नाव आहे. पोलिसांनी दिलेल्या माहितीनुसार, हडपसर येथील चिंतामणी मोटर्स दुकानातून ३१ मार्चला चोरट्यांनी दोन मोटारी चोरून नेल्या होत्या. या प्रकरणी हडपसर पोलिस ठाण्यात गुन्हा दाखल केला होता. गुन्हे शाखेच्या युनिट पाचचे वरिष्ठ पोलिस निरीक्षक विश्वजित काईंगडे यांनी घटनास्थळी भेट देऊन तपास सुरू केला. पवन अलकुंटे याने त्याच्या मित्राच्या मदतीने मोटारी चोरुन नेल्या. त्यापैकी एका मोटारीची नंबरप्लेट काढून तिचा वापर तो करीत होता. यवतवरुन तो पुण्याच्या दिशेने येणार असल्याची माहिती पोलिस कर्मचारी अमित कांबळे यांना मिळाली. त्यानुसार शेवाळेवाडी येथे नाकाबंदी करण्यात आली आणि अलकुंटेसह अल्पवयीन मुलाला ताब्यात घेतले.

मौजमजेसाठी चोरी
आरोपींनी मौजमजा करण्यासाठी कार बाजारातील दुकानातून दोन मोटारींची चोरी केली. त्यांच्या ताब्यातून १० लाख ५० हजार रुपये किमतीच्या दोन मोटारी जप्त केल्या आहेत. आरोपीची न्यायालयीन कोठडीत रवानगी केल्याचे पोलिसांनी सांगितले.