Pune Summer Temperature : कमाल तापमानाचा आणखी उच्चांक ; तिसऱ्यांदा पारा ४१ अंश सेल्सिअसपेक्षा जास्त

पुणे : पुण्यात शिवाजीनगर येथे यंदाच्या उन्हाळ्यात कमाल तापमानाचा ४१.८ अंश सेल्सिअसचा नवा उच्चांक सोमवारी नोंदविला गेला. शहरात सलग दुसऱ्या दिवशी कमाल पारा ४१ अंश सेल्सिअसपेक्षा जास्त होता.

राज्यात बहुतांश भागात उष्णतेच्या लाटेसारखी स्थिती निर्माण झाली आहे. बहुतांश भागात कमाल तापमान सरासरीपेक्षा ३ ते ४ अंश सेल्सिअसने वाढले आहे. सर्वाधिक तापमान मालेगावमध्ये ४४ अंश सेल्सिअस नोंदविले गेले. पुण्यात वडगाव शेरी येथे ४३.४ अंश सेल्सिअसपर्यंत कमाल तापमान होते.
शिवाजीनगर येथील वेधशाळेत रविवारी (ता. २८) यंदाच्या उन्हाळ्यातील उच्चांकी तापमानाची (४१.३ अंश सेल्सिअस) नोंद झाली होती. यंदा ४१ अंश सेल्सिअसपेक्षा तापमान वाढण्याची ही तिसरी घटना आहे.

उन्हाचा चटका वाढणार
पुणेकरांनो, पुढील दोन दिवस उन्हाचा चटका कायम राहणार असल्याने काळजी घ्या, असा संदेशही हवामान खात्यातर्फे देण्यात आला आहे. मंगळवारी (ता. ३०) आणि बुधवारी (ता. १) कमाल तापमान ४१ अंश सेल्सिअसपर्यंत जाईल. बुधवारी (ता. १) ते ४२ अंश सेल्सिअसपर्यंत वाढेल, असा अंदाज आहे. आकाश मुख्यतः निरभ्र राहणार असल्याने उन्हाचा चटका वाढण्याची शक्यता आहे.

असा वाढला उन्हाचा चटका (आकडे अंश सेल्सिअसमध्ये)
२४ एप्रिल ............ ३८.५
२५ ......................... ३९.४
२६ ......................... ४०.३
२७ ......................... ३९.९
२८ ......................... ४१.३
२९ .......................... ४१.८

एप्रिलमधील आतापर्यंतचे उष्ण दिवस (आकडे अंश सेल्सिअसमध्ये)
वर्ष ............ कमाल तापमान
१८९७ ............ ४३.३
१९५८ ............. ४३.२
२०१९ ............. ४३
२०१९ ............. ४२.९
१९६१ ............. ४२.८
१९५६ ............. ४२.७
२०१९ ............. ४२.६
१९८३ ............. ४२.५
१९६४ ............. ४२
२००८ ............. ४२.१