स्वतंत्र वॉर्ड विकास निधी द्यावा : प्रफुल्ल कदम

पुणे, ता. २७ : ‘‘आमदार आणि खासदार यांच्याप्रमाणे ग्रामपंचायत सदस्य, नगरपालिका आणि महानगरपालिका नगरसेवकांना प्रत्येक वॉर्डासाठी दरवर्षी किमान १० लाख ते ५० लाख रुपये स्वतंत्र वॉर्ड विकास निधी म्हणून देण्यात यावा. जेणेकरून ग्रामपंचायत सदस्य आणि नगरसेवकांना स्वतंत्र अधिकार आणि दर्जा बहाल होईल. या स्वतंत्र वॉर्ड विकास निधीमुळे देशात क्रांती घडेल’’, अशी मागणी किसान आर्मी व वॉटर आर्मीचे प्रफुल्ल कदम यांनी पत्रकार परिषदेद्वारे केली आहे.
ग्रामपंचायती, नगरपालिका आणि महानगरपालिका यांच्या प्रत्येक वॉर्डला निधीची तरतूद झाली, तर देशात खऱ्या अर्थाने विकास होईल. देशातील दोन लाख ५५ हजार ३६६ ग्रामपंचायती, तीन हजार ७४१ नगरपालिका, २४१ महानगरपालिका यांच्या साहाय्याने लाखो सदस्यांना वॉर्डात विकास घडवून आणण्यासाठी निधी मिळाला, तर अनेक स्थानिक समस्या दूर होतील, असे कदम यांचे म्हणणे आहे. याशिवाय, शिक्षक व पदवीधर मतदारसंघाप्रमाणे ग्रामपंचायत सदस्यांचा आणि नगरसेवकांचा स्वतंत्र मतदारसंघ तयार करून राज्यातून आणि देशातून कायदेमंडळात प्रतिनिधी निवडण्यात यावेत, वॉर्ड हे विकासाचे पायाभूत युनिट मानण्यात यावे, तसेच ग्रामपंचायत, नगरपालिका आणि महानगरपालिका निवडणुकीमध्ये दुसऱ्या क्रमांकाचे मतदान झालेल्या पराभूत उमेदवाराला विजयी उमेदवारांच्या तुलनेत किमान ५० टक्के विकास निधी स्वतंत्रपणे देण्यात यावा, अशा मागण्या कदम यांनी केल्या आहेत. या मागण्या मान्य झाल्यास विकास निधी थेट वॉर्डात पोचेल आणि वॉर्डात गतिमान पद्धतीने विकास होऊ शकेल, असा विश्वास कदम यांनी व्यक्त केला आहे.