पाणी साचणाऱ्या १७० ठिकाणांची निवड

पुणे, ता. ९ : शहराच्या वेगवेगळ्या भागांत पाणी साचणारी १७० ठिकाणे महापालिकेने निवडली आहेत. याबरोबरच आणखी नवीन ठिकाणे शोधून त्यांची नोंद घेतली जात आहे. पाण्याचा निचरा होण्यासाठी पावसाळी वाहिन्या, चेंबरवर साचलेला कचरा साफ करणे आणि पाणी प्रवाही राहण्यासाठी यंत्रसामग्रीचा वापर केला जात आहे.
पुण्यात मंगळवार आणि शनिवारी सायंकाळी झालेल्या मुसळधार पावसामुळे महापालिकेची यंत्रणा उघडी पडली. शनिवारी वेगवेगळ्या भागांत पाणी साचण्याच्या घटना घडल्या. त्यामुळे जनजीवन विस्कळित झाले होते. या दरम्यान महापालिकेची यंत्रणा रस्त्यांवर न दिसल्याने टीकेची झोड उठली होती. त्यामुळे महापालिकेची यंत्रणा रविवारी काही प्रमाणात हलली.
पाणी साचण्याची कारणे शोधून त्यावर उपाययोजना केल्या जात आहेत. चेंबरच्या जाळ्यांमध्ये कचरा अडकल्याने पाणी साचते, त्यामुळे तेथे कचरा अडकून राहू नये यासाठी यंत्रणा कार्यान्वित केली आहे. मनुष्यबळ, ठिकठिकाणी पंप, जेंटिंग मशिनद्वारे पाणी काढण्यासाठी भर देण्यात येणार आहे.

पाणी साचण्याची ठिकाणे निश्‍चित करून तेथे पुन्हा पाणी साचू नये, यासाठी उपाययोजना सुरू केल्या आहेत. याबरोबरच पाणी साचणारी नवीन ठिकाणे शोधून तेथेही उपाययोजना केल्या आहेत.
- महेश पाटील,
उपायुक्त, आपत्ती व्यवस्थापन विभाग