डोक्‍यात दगड घालून बाणेरमध्ये मजुराचा खून

पुणे, ता. १० ः मजुराच्या डोक्‍यात दगड घालून खून करण्यात आल्याची घटना बाणेरमध्ये सोमवारी सकाळी उघडकीस आली. खुनाचे कारण अद्याप स्पष्ट झालेले नाही. या प्रकरणी चतु:शृंगी पोलिस ठाण्यात गुन्हा दाखल करण्यात आला. नाना विठ्ठल चादर (वय ३६, रा. वाकड) असे मृताचे नाव आहे. याप्रकरणी त्याचा भाऊ सचिन (वय ३४) याने चतु:शृंगी पोलिस ठाण्यात फिर्याद दिली. त्यावरून अज्ञात व्यक्तींविरुद्ध गुन्हा दाखल करण्यात आला. नाना बाणेर परिसरातच मजुरी करायचा. त्याला मद्याचे व्यसन होते. दोन दिवसांपूर्वी तो बेपत्ता झाला होता. सोमवारी सकाळी धनकुडे वस्ती भागात एक मृतदेह आढळल्याची माहिती पोलिसांना मिळाली. मृतदेहाची ओळख पटविल्यानंतर सचिन यास कळविण्यात आले. खुनाच्यादृष्टीने तपास केला जात असल्याचे पोलिस निरीक्षक अजय कुलकर्णी यांनी सांगितले.
-----