पूरग्रस्तांना वैद्यकीय, आर्थिक मदत

पुणे, ता. ९ : पुणे डॉक्टर्स असोसिएशनच्या वतीने सोलापूर आणि मराठवाड्यातील निवडक गावांतील पूरग्रस्तांना वैद्यकीय, आर्थिक मदत आणि शैक्षणिक साहित्याचे वाटप करण्यात आले. नरखेड येथील स्थानिक डॉक्टर्स आणि असोसिएशनचे माजी अध्यक्ष डॉ. राज लवंगे यांच्या समन्वयातून संस्थेने पूरग्रस्तांना मदत करण्याचा निर्धार केला होता. जिल्हा परिषद शाळा क्रमांक एक आणि क्रमांक दोन, साठे वस्ती (भोयरे), जिल्हा परिषद शाळा (पासलेवाडी), जिल्हा परिषद शाळा (एकुरखे), इंग्लिश स्कूल (नरखेड), जिल्हा परिषद शाळा (बोपले) या ठिकाणी गरजू विद्यार्थ्यांना शालोपयोगी साहित्य व खाद्यपदार्थ याचे वाटप करण्यात आले, तसेच एकुरखे आणि बोपले या पूरग्रस्त ग्रामपंचायतींना संस्थेच्या माध्यमातून आर्थिक मदतीचा धनादेश देण्यात आला. असोसिएशनच्या अध्यक्षा डॉ. दीपा वाघ आणि संस्थेचे सर्व पदाधिकारी व कार्यकारिणी समितीच्या मार्गदर्शनाखाली उपाध्यक्ष डॉ. संतोष कवितके, माजी अध्यक्ष राजेश माने, डॉ. योगेश एक्के, डॉ. जगदीश बंग या सर्वांनी या उपक्रमात भाग घेऊन मोफत आरोग्य तपासणी व ओषधोपचार केले. यामध्ये सचिव डॉ. महेश शिंदे, खजिनदार डॉ. शर्वरी अवलस्कर, डॉ. रोहन तोडकर, उमेश कुंभार, बाबासाहेब जगताप आदींनी सहकार्य केले.