एसटी प्रवासी महिलेचे सात लाखांचे दागिने चोरीला

पुणे, ता. ११ : एसटी प्रवासी महिलेच्या पिशवीतून चोरट्यांनी रोकड आणि दागिने असा सहा लाख ९० हजार रुपयांचा ऐवज लांबविल्याची घटना घडली. या प्रकरणी चंदननगर पोलिसांनी चोरट्यांवर गुन्हा दाखल केला आहे.
याबाबत एका महिलेने चंदननगर पोलिस ठाण्यात फिर्याद दिली आहे. तक्रारदार महिला मूळच्या नवी मुंबईच्या आहेत. त्या गुरुवारी (ता. ९) सकाळी एसटी बसमधून निघाल्या होत्या. हडपसर भागातील मगरपट्टा सिटी ते वडगाव शेरी दरम्यान चोरट्यांनी त्यांच्या पिशवीतून दोन हजारांची रोकड आणि सोन्याचे दागिने असा सहा लाख ९० हजार रुपयांचा ऐवज लांबविला. सहायक पोलिस निरीक्षक विकास बाबर तपास करत आहेत.

पीएमपीमधूनही दागिने लंपास
पीएमपी प्रवासी महिलेच्या पिशवीतून एक लाख रुपयांचे दागिने लांबविल्याची घटना बंडगार्डन रस्त्यावर घडली. याबाबत एका महिलेने कोरेगाव पार्क पोलिस ठाण्यात फिर्याद दिली आहे. तक्रारदार महिला पर्वती भागात राहायला आहेत. त्या शुक्रवारी (ता. १०) सायंकाळी पाचच्या सुमारास पीएमपी बसने प्रवास करत होत्या. त्यावेळी ही घटना घडली.