बावधनमधील पाण्‍यात कॉलीफॉर्म जिवाणू महापालिकेला बारा नमुने आढळले दूषित

पुणे, ता. ११ : बावधन परिसरात पिण्‍याच्‍या पाण्याच्या नमुन्यांमध्ये पोटदुखी, उलट्या, अतिसार यांसारख्या आजारांना कारणीभूत ठरणारा ‘कॉलीफॉर्म’ जिवाणू आढळला आहे. या रुग्‍णांना त्रास झाल्‍यावर या भागातून एकूण ९३ पाण्याचे नमुने तपासणीसाठी घेतले होते. त्यापैकी १२ नमुन्यांमध्ये ‘कॉलीफॉर्म ’ जिवाणू असल्‍याचे आढळून आले तर १४ नमुन्यांमध्ये पाणी शुद्ध करण्‍यासाठी वापरल्या जाणाऱ्या क्लोरीनचे प्रमाण अत्यल्प होते. उर्वरित पाण्‍याचे नमुने पिण्‍यास योग्‍य असल्‍याचे आढळले.
गेल्या काही दिवसांपासून या भागातील रुग्णसंख्या ११० झाली आहे. त्यापैकी सात रुग्ण रुग्णालयाच्या बाह्यरुग्ण विभागातून आणि नऊ रुग्ण घरगुती तपासणीत आढळले. दरम्‍यान, पिण्‍याच्‍या पाण्‍यात दूषित पाणी किंवा मलमूत्राचे दूषित पाणी मिसळले गेल्‍याने या परिसरातील नागरिक आजारी पडल्‍याचे सांगण्‍यात येत आहे.
महापालिकेच्या आरोग्य विभागाने तातडीने उपाययोजनाही सुरू केल्या आहेत. आतापर्यंत ६ हजार ४६० घरांची तपासणी केली असून, २३ हजार २७० नागरिकांना माहिती दिली आहे. सध्या परिस्थिती नियंत्रणात असल्याची माहिती आरोग्‍य विभागातील अधिकाऱ्यांनी दिली. नागरिकांना शुद्ध बाटल्यांचे पाणी वाटप केले आहे. पाणीपुरवठा वाहिन्यांमध्ये क्लोरिन टाकण्‍याची प्रक्रिया देखील वाढवण्यात आली असून, मेडिक्‍लोअर पाण्‍याचे शुद्धीकरण करणाऱ्या बाटल्‍यांचे वाटप करण्‍यात आले असल्‍याची माहिती आरोग्‍यप्रमुख डॉ. नीना बोराडे यांनी दिली.