मी खूप समंजस माणूस ः दत्तात्रेय भरणे

पुणे, ता. ४ ः ‘‘माझ्या बोली भाषेचा विपर्यास केला गेला. अधिकाऱ्यांनी शेतकऱ्यांची अडवणूक करू नये यासाठी मी बोली भाषेत बोललो होतो. शेतकऱ्यांसाठी जे गरजेचे आहे ते आम्ही करू, मी शेतकऱ्याचा मुलगा आहे. मी चुकणारा माणूस नाही. मी खूप समंजस माणूस आहे,’’ असे प्रतिपादन कृषीमंत्री दत्तात्रेय भरणे यांनी सोमवारी केले.
पुण्यात पत्रकारांशी संवाद साधताना, कृषिमंत्रीपद मिळाल्यानंतर एका कार्यक्रमामध्ये केलेल्या वक्तव्यावर विरोधकांनी टीका केली. याबाबत विचारलेल्या प्रश्नावर ते बोलत होते. वाकडं काम ही गावातील बोली भाषा आहे, विनाकारण त्या वाक्याचा विपर्यास केल्याचे म्हणत भरणे म्हणाले, ‘‘कृषी अधिकाऱ्यांच्या तक्रारी आल्या तर त्यांच्यावर योग्य ती कारवाई केली जाईल. मी चुकणारा माणूस नाही मी खूप समंजस माणूस आहे, मी असे वक्तव्य करणार नाही.’’
खासदार संजय राऊत यांनी केलेल्या टीकेबाबत विचारले असता भरणे म्हणाले, ‘‘मी जे भाषण केले त्या भाषणाचा पूर्ण सारांश तुम्ही ऐका त्यात मी चुकीचे बोललेलो नाही. संजय राऊत मोठे नेते आहेत, मी त्यांच्यावर बोलणे योग्य नाही.’’ कर्जमाफीबाबत ते म्हणाले, ‘‘उद्या मी पदभार स्वीकारल्यानंतर या संदर्भातला आढावा घेईल. कर्जमाफी संदर्भात मुख्यमंत्री दोन्ही उपमुख्यमंत्री योग्य निर्णय घेतील.’’