युवकांनी घेतले ‘सडक सुरक्षा अग्रदूत’ प्रशिक्षण

पुणे, ता. ४ ः आवास फायनान्सियर्स लिमिटेड, राजस्थान रस्ता सुरक्षा सोसायटी, सीआयआरटी, आईडीटीआर व मोटर वाहन विभाग यांच्या वतीने ‘आवास यूथ रस्ता सुरक्षा शिक्षण व जागरूकता अभियान’चे आयोजन केले होते. यात २०० युवकांनी ‘रस्ता सुरक्षा अग्रदूत’ म्हणून प्रशिक्षण पूर्ण करून ‘सुरक्षित रस्ते आणि समृद्ध भारत’ घडविण्याची शपथ घेतली. या वेळी सहायक प्रादेशिक परिवहन अधिकारी चंद्रकांत माने हे प्रमुख पाहुणे म्हणून उपस्थित होते.
या अभियानात ‘रस्ते सुरक्षाविषयक विशेष प्रशिक्षण’ देण्यात आले. सीआयआरटीचे रस्ता सुरक्षा प्रमुख प्रशांत काकडे यांनी हेल्मेटच्या वापराचे महत्त्व स्पष्ट केले आणि वाहनचालकांनी नियमांचे काटेकोरपणे करणे गरजेचे असल्याचे सांगितले. रस्ता सुरक्षा तज्ज्ञ डॉ. वीरेंद्रसिंह राठोड यांनी रस्ता सुरक्षा चक्र योजनेविषयी माहिती देत अपघातग्रस्तांना तातडीने मदत करण्याचे महत्त्व विशद केले. ‘आईडीटीआर’चे प्राचार्य संजय ससाणे यांनी युवकांना सुरक्षित वाहन चालविण्याचे महत्त्व पटवून देत सावध राहण्याचे व ‘सुरक्षा फक्त एक नारा नसून, ती आपलं जीवन जगण्याची पद्धत आहे’ असे सांगितले.