परमहंस स्वामी स्वरूपानंद जीवनगौरव पुरस्काराचे २१ला वितरण

पुणे, ता. १० : सावित्रीबाई फुले पुणे विद्यापीठाच्या संत नामदेव अध्यासनाच्या वतीने देण्यात येणाऱ्या ‘परमहंस स्वामी स्वरूपानंद जीवनगौरव पुरस्कार’ यंदा संत साहित्याचे अभ्यासक डॉ. अशोक कामत यांना जाहीर झाला असून, त्यांना हा पुरस्कार मरणोत्तर प्रदान करण्यात येणार आहे. हा सोहळा २१ मार्च रोजी कर्वे रस्ता येथील स्वामिकृपा हॉल येथे होणार आहे. या वेळी ‘महाराष्ट्र टाइम्स, पुणे’चे संपादक श्रीधर लोणी हे प्रमुख पाहुणे म्हणून उपस्थित राहणार आहेत. विद्यापीठाचे कुलगुरू डॉ. सुरेश गोसावी यांच्या हस्ते आणि प्र-कुलगुरू डॉ. पराग काळकर, प्रभारी कुलसचिव डॉ. ज्योती भाकरे यांच्या उपस्थितीत हा सोहळा होणार आहे. पुरस्कार सोहळ्यापूर्वी स्थापत्य आणि मूर्तिशास्त्राचे अभ्यासक अनिल स्वामी यांचे ‘संत नामदेवराय यांच्या पाऊलखुणांचा मागोवा (परभणी आणि हिंगोली जिल्हा)’ विषयावर व्याख्यान होणार आहे, अशी माहिती विद्यापीठाच्या संत नामदेव अध्यासनाच्या प्रमुख डॉ. श्यामा घोणसे यांनी दिली.