कोरेगाव पार्क परिसरात उन्हाचा चटका वाढला - उपनगरातील पारा ४० अंशावर

पुणे, ता. १८ : शहर आणि परिसरामध्ये गेल्या आठवड्यापासून कमाल आणि किमान तापमानामध्ये सातत्याने घट होत होती. मात्र मंगळवारी (ता. १८) कोरेगाव पार्क परिसरामध्ये ४१.३ अंश सेल्सिअस तापमानाची नोंद झाली. त्यामुळे उपनगरांमध्ये उन्हाचा चटका वाढला आहे. दरम्यान शहरामध्ये शिवाजीनगर परिसरात ३८ अंश सेल्सिअस कमाल तापमानाची नोंद झाली. पुढील दोन दिवसांत कमाल तापमानात किंचित घट होण्याची शक्यता भारतीय हवामानशास्त्र विभागाने वर्तविली आहे.
गेल्या काही दिवसांपासून वातावरणात मोठे बदल होताना दिसत आहेत. कमाल आणि किमान तापमानामध्ये सातत्याने चढ-उतार होत आहे. बदलत्या वातावरणामुळे पुणेकर हैराण झाले आहेत. मार्च महिन्याच्या पहिल्या दिवसापासून शहरासह जिल्ह्यातील कमाल तापमानात कमी-अधिक वाढ होत असल्याने उन्हाचा चटका जाणवत आहे. गेल्या काही दिवसांमध्ये कमाल व किमान तापमानात काही अंशी घट झाली होती. मात्र, मंगळवारी कोरेगाव पार्क, लोहगाव आणि मगरपट्टा परिसरामध्ये कमाल तापमानात एक ते दोन अंशाने वाढ झाली. त्यामुळे या सर्व भागातील कमाल तापमान ४० अंशाच्या पुढे नोंदविले गेले.
पुणे आणि परिसरात बुधवारी (ता. १९) कमाल तापमान स्थिर राहून ३८ अंश सेल्सिअस इतके तर किमान तापमान १७ अंश सेल्सिअस नोंदवले जाईल. आकाश मुख्यतः निरभ्र राहण्याची शक्यता आहे. गुरुवारी (ता. २०) कमाल तापमानात किंचित घट होऊन ते ३७ अंश सेल्सिअस नोंदविले जाईल तर किमान तापमानामध्ये वाढ होऊन ते १९ अंश सेल्सिअस नोंदविले जाईल. दुपारी किंवा सायंकाळी आकाश अंशतः ढगाळ राहण्याची शक्यता हवामानशास्त्र विभागाने वर्तविली आहे.