‘एनएमएमएस’ परीक्षा आता २८ डिसेंबरला

पुणे, ता. ८ : महाराष्ट्र राज्य परीक्षा परिषदेमार्फत घेण्यात येणाऱ्या राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना (एनएमएमएस) परीक्षेच्या वेळापत्रकात बदल करण्यात आला आहे. राज्यातील सर्व जिल्ह्यांमध्ये आता ही परीक्षा २८ डिसेंबर रोजी घेण्यात येणार आहे, अशी माहिती राज्य परीक्षा परिषदेच्या आयुक्त अनुराधा ओक यांनी दिली आहे.
राज्य परीक्षा परिषदेतर्फे राज्यातील इयत्ता आठवीतील विद्यार्थ्यांसाठी ‘एनएमएमएस’ शिष्यवृत्तीसाठी परीक्षा घेतली जाते. परिषदेने जाहीर केलेल्या वेळापत्रकानुसार ही परीक्षा २१ डिसेंबर रोजी होणार होती. मात्र, महाराष्ट्र लोकसेवा आयोगाने नुकतेच विविध स्पर्धा परीक्षांचे सुधारित वेळापत्रक प्रसिद्ध केले आहे. त्यातील महाराष्ट्र अराजपत्रित गट ब संयुक्त पूर्व परीक्षा २१ डिसेंबर रोजी आयोजित करण्याचे आयोगाने जाहीर केले आहे. त्यामुळे ‘एनएमएमएस’ परीक्षा आणि ‘एमपीएससी’ परीक्षा एकाच दिवशी येत असल्याचे स्पष्ट झाले. या पार्श्‍वभूमीवर राज्य परीक्षा परिषदेने ‘एनएमएमएस’ शिष्यवृत्तीच्या परीक्षेच्या वेळापत्रकात बदल करण्याचा निर्णय घेतला आहे. आता ही परीक्षा २१ डिसेंबरऐवजी २८ डिसेंबरला राज्यातील सर्व जिल्ह्यांमध्ये होणार असल्याचे राज्य परीक्षा परिषदेने स्पष्ट केले आहे.