पुण्यात आज रंगणार ‘नक्षत्रांचे देणे’

पुणे, ता. २२ ः ज्येष्ठ संगीतकार पं. हृदयनाथ मंगेशकर यांच्या संगीत क्षेत्रातील चौफेर कार्याचे दर्शन घडवणारा ‘नक्षत्रांचे देणे - पं. हृदयनाथ मंगेशकर’ हा कार्यक्रम शनिवारी (ता. २३) सायंकाळी ६.३० वाजता कर्वेनगरच्या डीपी रस्त्यावरील पंडित फार्म येथे सादर होणार आहे. या कार्यक्रमाची मोजकीच तिकिटे आता शिल्लक आहेत.
सकाळ माध्यम समूहातर्फे आयोजित या कार्यक्रमाची संकल्पना आणि सादरीकरण ‘इंडियन मॅजिक आय’ यांचे आहे. ‘सॅपिएंट फिनसर्व’ हे या कार्यक्रमाचे मुख्य प्रायोजक असून ‘लोकमान्य मल्टिपर्पज को-ऑप सोसायटी लि.’ हे या कार्यक्रमाचे सहयोगी प्रायोजक आहेत.
हृदयनाथ मंगेशकर यांच्या ‘गगन सदन’, ‘ये रे घना’, ‘मी डोलकर’, ‘केव्हातरी पहाटे’, ‘मी रात टाकली’, ‘दयाघना’, ‘तरुण आहे रात्र अजूनी’ अशा असंख्य अजरामर रचना या कार्यक्रमात ऐकायला मिळणार आहेत. त्यासोबतच या गीतांच्या निर्मितीमागची प्रेरणा, काही अपरिचित किस्सेही उलगडणार आहेत.
या कार्यक्रमाची मोजकीच तिकिटे शिल्लक असून www.ticketkhidakee.com आणि www.bookmyshow.com या संकेतस्थळांवर किंवा बातमीसोबत दिलेल्या क्यूआर कोडद्वारे तिकिटे आरक्षित करता येणार आहेत. काही जागा राखीव असतील.

हे लक्षात ठेवा
कधी : शनिवार (ता. २३)
केव्हा : सायंकाळी ६.३० वाजता
कुठे : पंडित फार्म, डीपी रस्ता, कर्वेनगर