वैमनस्यातून तरुणाचा खुनाचा प्रयत्न

पुणे, ता. २३ : पूर्वी झालेल्या वादातून तरुणावर हल्ला करून त्याच्या डोक्यात गज घालण्यात आला. हडपसर-सासवड रस्त्यावरील वडकी नाला भागात ही घटना घडली असून खुनाचा प्रयत्न केल्याप्रकरणी फुरसुंगी पोलिसांकडून पाच जणांविरुद्ध गुन्हा दाखल करण्यात आला आहे.
विकी सुरेश खोमणे (वय ३८, रा. माळेगाव बुद्रुक, ता. बारामती) असे गंभीर जखमी झालेल्याचे नाव आहे. खोमणे याच्या फिर्यादीवरून या प्रकरणी ऋषिकेश हनुमंत चव्हाण (वय ३२, रा. अंजनगाव, ता. बारामती), मयूर संजय चव्हाण (वय ३०, रा. लक्ष्मीनगर, बारामती), तेजस तानाजी खंडाळे (रा. लखडेनगर, माळेगाव, ता. बारामती), सूरज बाबजी खोमणे (रा. माळेगाव खुर्द), अक्षय ऊर्फ गोटू छगन माकर (रा. माळेगाव खुर्द, ता. बारामती) यांच्यावर गुन्हा दाखल झाला असे.
पोलिसांनी दिलेल्या माहितीनुसार, विकी खोमणे मजुरी करतो. आरोपी आणि खोमणे यांच्यात २०११ मध्ये वाद झाला होता. त्या वेळी त्यांनी एकमेकांविरुद्ध परस्परविरोधी फिर्याद दिली होती. २०१७ मध्ये त्यांच्यातील वाद मिटले. आरोपी चव्हाण, खंडाळे, खोमणे, माकर यांच्याविरुद्ध यापूर्वी गुन्हे दाखल झाले आहेत. १६ ऑगस्टला सायंकाळी पाचच्या सुमारास खोमणे वडकी नाला भागात थांबला होता. त्यावेळी आरोपींनी त्याला शिवीगाळ करून मारहाण केली. त्याच्या डोक्यात दगड घातला, तसेच गज मारला. गंभीर जखमी झालेल्या खोमणे याने रुग्णालयात उपचार घेतले आणि नुकतीच फुरसुंगी पोलिस ठाण्यात तक्रार दिली.