आम्‍हाला आमची शेतजमीन परत द्या मांजरीतील शेतकऱ्यांची मागणी

पुणे, ता. २३ : इंग्रज सरकारने १९३२ मध्‍ये हवेली तालुक्‍यातील मांजरीमधील २५४ एकर वडिलोपार्जित शेतजमीन ‘ड्रेनेज योजना प्रकल्‍प’ या व्‍यवस्‍थापनासाठी संपादित केली आहे. त्‍यापैकी काही जमीन ही वसंतदादा शुगर इन्स्टिट्यूटला दिली असून, उरलेली १५४ एकर मात्र ड्रेनेज प्रकल्‍प तयार न करता विनावापर शासन दरबारी पडून आहे. ती जमीन मूळ मालकांना परत करावी, अशी मागणी मांजरीतील शेतकऱ्यांच्‍या कृती समितीने पत्रकार परिषदेत केली. यावेळी मांजरी बुद्रुक ड्रेनेज कृती समितीचे अध्‍यक्ष मधुकर घुले, ॲड. बाबूराव वाघमारे व समितीमधील शेतकरी उपस्थित होते.
घुले म्‍हणाले, ‘‘आम्‍ही या जमिनीचे वारसदार असून, देश स्‍वतंत्र झाल्‍यावर तत्‍कालीन सहकारमंत्री वैकुंठ मेहता यांनी कोणत्‍याही प्रकारचा ठराव पास न करता ही शेतजमीन १९४८ मध्‍ये ‘मे. सुभाष सामुदायिक शेतकरी संघ, मांजरी बुद्रुक’ यांना प्रथम दहा वर्षांसाठी कसण्‍यासाठी दिली होती. थोडक्‍यात इंग्रज सरकारने ज्या हेतूसाठी ही जमीन संपादित केली होती, तो प्रकल्‍प मात्र झालेला नाही. तत्‍कालीन शासनाला हाताशी धरून संबंधित शेतकरी संघ त्‍याचा वापर करत आहे. ही जमीन मूळ मालकांना द्यावी, अशी मागणी समितीच्‍या वतीने केली आहे.’’
...............