यंदा सात दिवसांसाठी रात्री बारा पर्यंत ‘बजाव’ जिल्हाधिकाऱ्यांकडून ध्वनिक्षेपकाला परवानगी

पुणे, ता. २५ : राज्य शासनाने गणेशोत्सवाला राज्य महोत्सव म्हणून साजरा करण्याचे घोषित केले आहे. या पार्श्वभूमीवर जिल्ह्यात सार्वजनिक गणेश मंडळांना ध्वनी प्रदूषणासंबंधी नियमांचे पालन करून गणेशोत्सवादरम्यान एकूण ७ दिवस सकाळी सहापासून ते रात्री बारापर्यंत ध्वनिक्षेपक व ध्वनिवर्धकाचा वापर करण्यास परवानगी देण्याबाबतचा आदेश जिल्हाधिकारी जितेंद्र डूडी यांनी दिला आहे.
दरवर्षी रात्री बारापर्यंत ध्वनिक्षेपक व ध्वनिवर्धक वापरासाठीची परवानगी साधारणपणे ५ दिवसांसाठी असते. मात्र, यंदा निर्बंधास सवलत दिल्याबाबत यापूर्वीच्या ३१ जानेवारीच्या आदेशात बदल करून हे सुधारित आदेश जारी केले आहेत. यानुसार गणेशोत्सवासाठी शनिवार ३० ऑगस्ट ते ४ सप्टेंबर व ६ सप्टेंबर या एकूण ७ दिवसांच्या कालावधीत या निर्बंधांना सवलत देण्यात आली आहे. याशिवाय नवरात्री उत्सवासाठी १ ऑक्टोबर व २ ऑक्टोबर, ख्रिसमससाठी २५ डिसेंबर आणि वर्षाअखेरसाठी बुधवार ३१ डिसेंबर रोजीही या निर्बंधांना सवलत देण्यात आली आहे. तसेच महत्त्वाच्या कार्यक्रमासाठी आवश्यकतेनुसार परवानगी देण्याच्या अनुषंगाने एक दिवस राखीव ठेवण्यात आला आहे.
ध्वनी प्रदूषण नियम २००० मधील नियम ३ व ४ व ध्वनी प्रदूषण (नियमन व नियंत्रण) सुधारित नियम २०१७ च्या नियम ५ उपनियम (३) चे पालन करण्यात यावे, ठरलेल्या मर्यादेपेक्षा जास्त आवाज ठेवू नये. ही सवलत शांतता क्षेत्रात लागू नसेल असेही आदेशात नमूद करण्यात आले आहे.