गणेशोत्सवात पदार्थांची विशेष तपासणी मोहीम

पुणे, ता. २६ : नागरिकांना स्वच्छ, निर्भेळ अन्न मिळण्यासाठी अन्न व औषध प्रशासन (एफडीए) गणेशोत्सवात विशेष तपासणी मोहीम राबविणार आहे. ‘एफडीए’ने जिल्ह्यात ११ ऑगस्टपासून आजपर्यंत ३५ अन्न आस्थापनांच्या तपासण्या केल्या आहेत. त्यामध्ये प्रसादासाठी लागणारे कच्चे अन्नपदार्थ व मिठाईचे ६२ नमुने विश्लेषणासाठी घेतले आहेत. याबाबतचा अहवाल प्राप्त होताच कायद्याप्रमाणे कारवाई करण्यात येणार आहे.
गणेशोत्सव व आगामी सणासुदीच्या काळात धडक कारवाई सुरूच राहणार आहे. राज्याचे अन्न व औषध प्रशासनाच्‍या मार्गदर्शनाखाली ही मोहिम पार पडणार आहे. ही कारवाई पुणे कार्यालयातील सर्व अन्न सुरक्षा अधिकारी व सहायक आयुक्तांमार्फत होत आहे. अन्न पदार्थांमध्ये भेसळीबाबत काही संशय असल्यास जागरूक नागरिकांनी संपर्क साधावा, असे आवाहन अन्न व औषध प्रशासनाचे सह आयुक्त (पुणे विभाग) सुरेश अन्नपुरे यांनी प्रसिद्घी पत्रकाद्वारे केले आहे.

प्रशासनाच्या टोल फ्री क्रमांक- १८००२२२३६५