सोनसाखळी चोरटे गजाआड

पुणे, ता. २६ : पीएमपी बसमधून प्रवासी महिलेची सोनसाखळी चोरून पसार झालेल्या चोरट्यांना पर्वती पोलिसांनी अटक केली. त्यांच्याकडून दोन तोळ्याची सोनसाखळी जप्त केली आहे.
अमर शंकर जाधव (वय ३८, रा. पिंगळे वस्ती, मुंढवा) आणि नीलेश शंकर जाधव (वय ३६, रा. केशवनगर, मुंढवा) अशी अटक केलेल्या चोरट्यांची नावे आहेत. याबाबत पर्वती पोलिस ठाण्यात फिर्याद देण्यात आली होती. तक्रारदार हे ११ ऑगस्टला सकाळी दहाच्या सुमारास पुणे-सातारा रस्त्यावरून पीएमपी बसमधून प्रवास करत होते. गर्दीचा फायदा घेत चोरट्यांनी त्यांच्या गळ्यातील दोन तोळ्याची सोनसाखळी लांबविली. पर्वती पोलिसांकडून या गुन्ह्याचा तपास सुरू होता. सराईत चोरटे जाधव यांनी ही चोरी केल्याची माहिती पोलिस कर्मचारी सद्दाम शेख यांना मिळाली. त्यानंतर पोलिसांनी सापळा लावून दोघांना ताब्यात घेतले. पर्वती पोलिस ठाण्याचे वरिष्ठ पोलिस निरीक्षक नंदकुमार गायकवाड, गुन्हे शाखेच्या पोलिस निरीक्षक अनिता हिवरकर, उपनिरीक्षक किरण पवार, पोलिस कर्मचारी प्रकाश मरगजे, मनोज बनसोड, महेश मंडलिक, सूर्या जाधव, श्रीकांत शिंदे आणि अमोल दबडे यांनी ही कामगिरी केली.