मोटारी दुरुस्ती करून परस्पर विकल्याचे उघड

पुणे, ता. २६ : चारचाकी वाहन दुरुस्तीला आल्यानंतर फिटरने ती दुरुस्त करून विकल्याचा प्रकार उघडकीस आला आहे. या फिटरला अटक करून पोलिसांनी तब्बल ५२ लाखांच्या सात चारचाकी जप्त केल्या आहेत.
भूषण उत्तम काळे (वय ३५, रा. कात्रज गावठाण) असे अटक केलेल्याचे नाव आहे. या प्रकरणी आंबेगाव पोलिस ठाण्यात गुन्हा दाखल होता. पोलिसांनी दिलेल्या माहितीनुसार, काळे हा चारचाकी दुरुस्ती तसेच पेंटिंगचे काम करतो. एका व्यक्तीने त्याच्याकडे मोटार पेंटिंग आणि सर्व्हिसिंगसाठी दिली होती. त्याने ती मोटार दुरुस्त करून सोलापूर येथील एका एजंटला परस्पर आठ लाख रुपयांना विकली. सोलापूरच्या एजंटने ती मोटार सांगलीतील एकाला दिली. दरम्यान, तक्रारदार मोटार घेण्यासाठी गेल्यानंतर हा प्रकार समोर आला. त्यांनी याबाबत आंबेगाव पोलिसांत धाव घेत तक्रार दाखल केली होती.
वरिष्ठ निरीक्षक शरद झिने यांनी याबाबत तपासाच्या सूचना पथकाला दिल्या होत्या. पथकाने तपास करून भूषण काळेला ताब्यात घेतले. चौकशीत त्याने गुन्हा केल्याची कबुली दिली. त्याला अटक करून तपास केल्यानंतर त्याने अशा पद्धतीने तब्बल ५२ लाख रुपयांच्या सात चारचाकी वाहने परस्पर विक्री करून फसविले असल्याचे समोर आले.