पं. कंदलगावकर यांच्या शिष्यांकडून गुरूवंदना

पुणे, ता. २६ : ​ज्येष्ठ गायक पं. राजेंद्र कंदलगावकर यांच्या शिष्यांतर्फे गुरुवंदना कार्यक्रमाचे आयोजन करण्यात आले होते. शिवाजीनगर येथील सवाई गंधर्व स्मारकात झालेल्या कार्यक्रमात शिष्यांनी विविध रागांचे सादरीकरण करून गुरूंना सुरांद्वारे अभिवादन केले. या विद्यार्थ्यांनी भीमपलास, यमन, भूप, रागेश्री, बागेश्री, दुर्गा, जोगकंस आदी राग सादर केले. प्रत्येक रागाच्या सादरीकरणातून गुरू-शिष्य परंपरेचा एक-एक टप्पा उलगडला. कार्यक्रमाची सांगता पं. कंदलगावकर यांच्या गायनाने झाली. त्यांनी राग मेघ, राग मिया मल्हार सादर केला. ‘संगीत हे घराण्यापलीकडचे आहे. त्यामुळे प्रत्येक राग हा आपलासा करून, आपण गाऊन त्याचा आनंद द्यावा आणि घ्यावा’, असा सल्ला पं. कंदलगावकर यांनी शिष्यांना दिला.