जिल्हा परिषदेच्या १८३ शाळांची दुरुस्ती

पुणे, ता. २७ : जिल्हा परिषदेच्या अखत्यारीतील तब्बल १८३ शाळांच्या वर्गखोल्यांची दुरुस्ती आणि नव्या कक्षांचे बांधकाम करण्यात आले आहे. जिल्हा परिषद शिक्षण विभागाच्या शाळा सबलीकरण कार्यक्रम या योजनेंतर्गत काही वर्ग हे नव्याने बांधण्यात आले आहेत. शाळांच्या उन्हाळ्याच्या सुट्टीत ही कामे हाती घेण्यात आली होती.
शाळांची दुरुस्ती सुरू असताना पावसामुळे काही शाळांच्या परिसरातील रस्ते खराब झाले होते. त्यामुळे विद्यार्थ्यांना शाळेत ये-जा करताना तसेच धान्य व इतर साहित्याच्या पुरवठ्यात अडचणी येत होत्या. ही परिस्थिती लक्षात घेऊन जिल्हा परिषद रस्त्यांच्या दुरुस्तीवरही भर देत आहे. दुरुस्तीत भिंत, छत, पाणीगळती, स्वच्छतागृह तसेच वर्गखोल्यांचे नवे बांधकाम आदी कामे करण्यात आली. त्याचबरोबर २०२५-२६ पूर्वीची अपूर्ण कामे, पानशेत शाळेचे थकबाकी देयक, तसेच खानवडी येथील ज्योती सावित्री इंटरनॅशनल स्कूलमधील अंतर्गत रस्त्यांच्या बांधकामासाठी निधी राखून ठेवला असल्याची माहिती जिल्हा परिषद प्रशासनाकडून देण्यात आली.