एक मिलिमीटरपासून साकारलेल्या सुवर्ण गणेशमूर्ती

पुणे, ता. २८ : गणेशोत्सवात नाशिक जिल्ह्यातील गणेशभक्त, कलाकार व जागतिक विक्रमवीर भगवानदास खरोटे यांनी (०.७६ एम. एम.) कमीतकमी जागेत एक मिलिमीटरपासून ते अवघ्या सव्वा स्क्वेअर इंच जागेत सोन्यामध्ये साकारलेल्या विविध सूक्ष्म सुवर्ण गणेशमूर्तींच्या कलाकृतींच्या ‘सकाळ’ आयोजित प्रदर्शनाला शुक्रवारी (ता. २९) प्रारंभ होत आहे. मंगळवार (ता. २ सप्टेंबर) पर्यंत हे प्रदर्शन आहे.
या प्रदर्शनाचे उद्‍घाटन शुक्रवारी सकाळी ११ वाजता घोले रस्ता येथील राजा रवी वर्मा कलादालनमध्ये सिद्धिविनायक ग्रुपचे अध्यक्ष राजेशकुमार सांकला व पुणे महापालिकेचे आयुक्त नवल किशोर राम यांच्या हस्ते आणि विविध क्षेत्रातील मान्यवरांच्या उपस्थितीत होणार आहे.
‘सकाळ माध्यम समूहा’तील ‘सकाळ-एनआयई’ (न्यूज पेपर इन एज्युकेशन) आणि ‘सकाळ सोशल फाउंडेशन’च्या वतीने आयोजित या उपक्रमाचे मुख्य प्रायोजक पुण्यातील बांधकाम क्षेत्रातील सिद्धिविनायक ग्रुप असून, सहयोगी प्रायोजक इंद्रिया ज्वेलर्स आहेत. याशिवाय श्रीमंत दगडूशेठ हलवाई गणपती मंदिराचे उपक्रमास सहकार्य लाभले आहे.

गणरायाची विविध रूपे
भगवानदास खरोटे यांनी सोन्यामध्ये साकारलेल्या गणेशमूर्ती इतक्या सूक्ष्म आहेत की, त्या सूक्ष्मदर्शीकेशिवाय पाहता येत नाहीत. सूक्ष्म गणेशमूर्तींच्या अनेक दुर्मिळ कलाकृती प्रदर्शनाच्या माध्यमातून शालेय विद्यार्थ्यांसह सर्वांना पाहता येणार आहेत. खरोटे यांनी २५६ सूक्ष्म सुवर्ण गणेश साकारले असून, यामध्ये तबला वादक, सनई वादक, हार्मोनियम वादक, झुल्यावर बसलेला, हातात तिरंगा घेतलेला, चहाची किटली आणि कपबशी घेऊन उभा असलेला श्रीगणेश ते विविध रत्नांवर अगदी मोत्यापासून पाचूपर्यंत त्यांनी गणेशाचे रूप साकारले आहे.

प्रदर्शनाविषयी...
कधी : शुक्रवार (ता. २९) ते मंगळवार (ता. २ सप्टेंबर)
कोठे : राजा रवी वर्मा कलादालन, घोले रस्ता, पुणे
केव्हा : सकाळी १०.३० ते रात्री ७
संपर्क : ८३७८९९३४४६/९८८१५९८८१५/९१३०००४९५५