पोलिस असल्याचे सांगून कामगारालाच लुटले

पुणे, ता. २८ : पोलिस असल्याची बतावणी करत महिला आणि पुरुष आशा दोघांनी लॉजवर जाऊन एका कामगाराला धमकावले. नंतर चौकशी करण्याची बतावणी करून पोलिस ठाण्यात येण्यास सांगितले. परंतु, त्याला त्यांच्याजवळील मोटारीत डांबून स्वारगेटला नेत मारहाण करत सहा हजारांची रोकड लुटली.
या प्रकरणी मथिलेशकुमार विष्णुदेव पाल (वय १९, रा. ईशा लॉज, धनकवडी, मुळ रा. मधुबनी, बिहार) यांनी सहकारनगर पोलिस ठाण्यात तक्रार दिली आहे. त्यावरुन पोलिसांनी दोघांवर गुन्हा दाखल केला आहे. ही घटना सातारा रस्त्यावरील शंकर महाराज मठासमोरील ईशा लॉज येथे बुधवारी सकाळी सव्वापाच ते साडेसहाच्या दरम्यान घडली.
पोलिसांनी दिलेल्या माहितीनुसार, पाल हे ईशा लॉजमध्ये कामाला आहे. बुधवारी पहाटे एक पुरुष व एक महिला लॉजवर आले. त्यांनी पोलिस असल्याची बतावणी केली. तू आमच्यासोबत पोलिस ठाण्यात चल, असे सांगून त्यांना जबरदस्तीने त्यांच्या पांढऱ्या रंगाच्या मोटारीमध्ये बसवले. स्वारगेटच्या दिशेने मोटार घेतली. त्यानंतर त्यांच्या मोबाईलवरून जबरदस्तीने ऑनलाइन सहा हजार रुपये ट्रान्स्फर करायला लावले. नंतर त्यांना रस्त्यात सोडून ते तेथून पळून गेले.