क्रीडा महोत्सवात २५ हजार खेळाडू मुरलीधर मोहोळ यांची माहिती, नोव्हेंबरमध्ये आयोजन

पुणे, ता. २९ ः पंतप्रधान नरेंद्र मोदी यांनी ‘फिट युवा फॉर विकसित भारत’ अशी साद घालत ‘खासदार क्रीडा महोत्सव’ या उपक्रमाची संकल्पना मांडली आहे. त्याअंतर्गत पुण्यातील विविध भागात नोव्हेंबरमध्ये सुमारे १५ दिवस खासदार क्रीडा महोत्सव होणार आहे. यात सुमारे ३३ क्रीडा प्रकाराचा समावेश असेल. याद्वारे सुमारे २५ हजार खेळाडू सहभाग नोंदविणार असल्याची माहिती केंद्रीय सहकार व नागरी हवाई वाहतूक राज्यमंत्री मुरलीधर मोहोळ यांनी पत्रकार परिषदेत दिली.
मोहोळ म्हणाले, ‘‘पुण्याच्या विविध भागांत असणारे मैदान, क्रीडा संकुल येथे पंधरा दिवस विविध क्रीडा स्पर्धा पार पडणार आहेत. या स्पर्धा जिल्हास्तरीय असतील. यामुळे स्थानिक खेळाडूंना मोठी संधी उपलब्ध होणार आहे. स्पर्धेचे हे पहिले वर्ष आहे. मात्र, आता दरवर्षी अशा प्रकारची स्पर्धा होईल. स्पर्धांना क्रीडा मंत्रालयाचेही सहकार्य असेल. स्पर्धेतील विजेत्यांना रोख रकमेची पारितोषिक दिली जातील.’’ या वेळी स्पर्धेचे प्रमुख समन्वयक छत्रपती पुरस्कार विजेते मनोज एरंडे, ऑलिंपिक खेळाडू व अर्जुन पुरस्कार विजेते मनोज पिंगळे, भारतीय हॉकी संघाच्या माजी कर्णधार व अर्जुन पुरस्कार विजेत्या रेखा भिडे, अर्जुन पुरस्कार विजेते कबड्डीपटू शांताराम जाधव, अर्जुन पुरस्कार विजेते विलास कथुरे, क्रिकेटपटू केदार जाधव, कुस्तीगीर संघाचे संदीप भोंडवे, हिंदकेसरी योगेश दोडके आदी उपस्थित होते.
-----------