जरांगे यांच्या आंदोलनामागे सरकार उलथवण्याचा अजेंडा लक्ष्मण हाके यांचा आरोप ः विरोधी पक्षासह ‘राष्ट्रवादी’ही सहभागी लक्ष्मण हाके यांचा आरोप

पुणे, ता. २९ ः मनोज जरांगे पाटील यांचे हे आंदोलन मराठा आरक्षणासाठी नाही, तर राज्यातील सरकार उलथून टाकण्यासाठीचा एक अजेंडा आहे. या कटात विरोधी पक्षासह सत्ताधारी राष्ट्रवादी कॉंग्रेसचे आमदार, खासदारदेखील सहभागी आहेत, असा गंभीर आरोप ओबीसी नेते लक्ष्मण हाके यांनी शुक्रवारी (ता. २९) पत्रकार परिषदेत केला. 
हाके म्हणाले, ‘‘जरांगे पाटील यांच्या चेहऱ्याआडून राज्यातील आमदार, खासदार सरकार अस्थिर करण्याचा प्रयत्न करत आहेत. त्यांची मागणी मान्य झाली, तर ओबीसींचे आरक्षण संपणार आहे. झुंडशाहीच्या जोरावर महाराष्ट्रातील ओबीसी रचना संपविण्याचा डाव आखला जात आहे.’’
पुढील भूमिका ठरविण्यासाठी आम्ही शनिवारी (ता. ३०) पुण्यात बैठक घेणार आहोत. त्यानंतर पुढील दिशा स्पष्ट करू. आम्ही ‘ओबीसी जोडो’ अभियान सुरू करणार आहोत. मंत्रिमंडळातील ओबीसी मंत्र्यांनी मुख्यमंत्री फडणवीस यांची भेट घ्यावी, जर ओबीसी आरक्षणाला धक्का लागला, तर या मंत्र्यांना ओबीसी समाज माफ करणार नाहीत, असा इशारादेखील हाके यांनी दिला.