‘एनसीएल’च्या आवारातील चंदनाची झाडे चोरणारे अटकेत

पुणे, ता. ३० : राष्ट्रीय रासायनिक प्रयोगशाळेच्या (एनसीएल) आवारात आलेल्या आणि चंदनाची सात झाडे कापून नेणाऱ्या चोरट्यांना सुरक्षारक्षकांनी पकडले. चोरट्यांबरोबर असलेले दोन साथीदार फरार झाले आहेत.
या प्रकरणी बाबू ताया लोखंडे (वय ४९, रा. केडगाव, ता. दौंड) आणि सुरेश पाटोळे (वय २८, रा. खुटबाव, चाळोबा वस्ती, ता.दौंड) यांना अटक करण्यात आली. या प्रकरणी दोन चोरट्यांवर गुन्हा दाखल केला असून, त्यांचा शोध घेण्यात येत आहे. याबाबत पराग रमेश चिटणीस (वय ५६, रा. एनसीएल कॉलनी, पाषाण रस्ता) यांनी चतु:शृंगी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, लोखंडे, पाटोळे आणि साथीदार हे शुक्रवारी मध्यरात्री राष्ट्रीय रासायनिक प्रयोगशाळेच्या आवारात
आले. त्यांनी चंदनाच्या सात झाडांचा बुंधा कापून नेला. रात्रपाळीत गस्त घालणाऱ्या सुरक्षारक्षकांनी चंदनचोरटे लोखंडे, पाटोळे आणि साथीदारांना पाहिले. सुरक्षारक्षकांनी लोखंडे आणि पाटोळे यांना पकडले. त्यांच्याबरोबर असलेले दोन साथीदार अंधारात भिंतीवरून उडी मारून फरार झाले.