गणेश मंडळे तरुणांसाठी व्यासपीठ

तरुण कार्यकर्ता
शैलेश बढाई (वय ४१), पुणे बढाई समाज ट्रस्ट
पुणे बढाई समाज ट्रस्ट या गणपती मंडळाचा सध्या मी अध्यक्ष असून लहानपणापासूनच मंडळाशी अप्रत्यक्षपणे जोडलो गेलो आहे. आमच्या मंडळाच्या मिरवणुकीत बैल जोडीचा रथ असल्याने आम्ही सर्व लहान मुले रथावर बसून संपूर्ण गणेशोत्सव बघायचो, अनुभवायचो. ते बघत बघतच केलेला मंडळाच्या कार्यकर्त्यापासून ते अध्यक्ष पदापर्यंतचा हा प्रवास खरच खूप काही शिकून गेला आणि मला स्वतःला विविध पैलूंवर घडवून गेला. गणेश मंडळे हे तरुणपिढीला खरच खूप मोठे व्यासपीठ आहे, जिथे ‘ऑन फिल्ड’ राहून कामे शिकता येतात. मंडळामुळे मला सामाजिक कामातदेखील रस निर्माण झाला. यामार्फत विविध लोक भेटले आणि अनुभवासह समाजात एक उत्तम स्थान मिळाले. ‘सर्व गणेश मंडळे समान’ या धोरणासाठी मी २०२२ साली लढलो. गणेश मंडळांमध्ये होणारे विविध प्रकारचे दुजाभाव, पूर्णपणे हटवून टाकण्यासाठी हा माझा मोठा संघर्ष आहे. फक्त ठराविक मंडळांना नाही तर प्रत्येक मंडळाला त्यांच्या कार्यकर्त्यांना समान मान-सन्मान, प्रेक्षकांची गर्दी व वाव हे अनुभवायला मिळावे, असा माझा प्रयत्न होता. तसेच विसर्जन मिरवणुकीत होणारे भेदभाव थांबवण्यासाठीही मी लढलो आणि जिंकलो. गणरायाने आणि मंडळाने मला या लढ्यात मोठी साथ दिली.