दोघांचे मोबाईल हिसकावले

पुणे, ता. १ : स्वारगेट आणि पुणे-सातारा रस्त्यावरील शंकर महाराज उड्डाणपूल परिसरात दोघांचे मोबाईल हिसकावून नेल्याच्या घटना घडल्या. स्वारगेट भागातील लक्ष्मीनारायण चित्रपटगृहाजवळ महाविद्यालयीन तरुणाचा मोबाईल चोरट्यांनी हिसकावून नेल्याची घटना घडली. याबाबत तरुणाने स्वारगेट पोलिस ठाण्यात फिर्याद दिली आहे. तक्रारदार तरुण शिवाजीनगर भागातील दीपबंगला चौकात एका खासगी वसतीगृहात राहायला आहे. तो शनिवारी सकाळी सव्वादहाच्या सुमारास लक्ष्मीनारायण चित्रपटगृह परिसरातून निघाला होता. त्यावेळी चोरट्यांनी त्याच्याकडील २५ हजारांचा मोबाईल हिसकावून नेला. तरुणाने आरडाओरडा केला. दुचाकीस्वार चोरटे भरधाव वेगात फरार झाले.
पुणे-सातारा रस्त्यावरील शंकर महाराज उड्डाणपुलाजवळ एका महिलेच्या हातातील ४० हजारांचा मोबाईल चोरट्यांनी हिसकावून नेला शनिवारी रात्री हा प्रकार घडला. याबाबत एका महिलेने सहकारनगर पोलिस ठाण्यात फिर्याद दिली आहे. तक्रारदार महिला धनकवडी भागात राहायला आहेत. त्या शनिवारी रात्री दहाच्या सुमारास शंकर महाराज उड्डाणपूल परिसरातून निघाल्या होत्या. त्या वेळी दुचाकीस्वार चोरट्यांनी महिलेच्या हातातील महागडा मोबाईल हिसकावून नेला. पोलिस हवालदार अमोल पवार तपास करत आहेत.