‘व्हीआयपीं’च्या दौऱ्याखाली सर्वसामान्यांना वेठीस धरू नका जे. पी. नड्डा यांचा दौरा ः मनसेचे पोलिसांना निवेदन

पुणे, ता. १ ः भारतीय जनता पक्षाचे अध्यक्ष जे. पी. नड्डा यांच्या पुणे दौऱ्यादरम्यान कर्वे रस्त्यावरील पार्किंगमधील वाहने पोलिसांनी काढण्यास नागरिकांना भाग पाडल्याच्या प्रकाराचा महाराष्ट्र नवनिर्माण सेनेने निषेध केला आहे. तसेच व्हीआयपींचा दौरा, या नावाखाली सर्वसामान्यांना वेठीस धरू नये, अशी मागणी केली आहे.
नड्डा हे भाजपचे राष्ट्रीय अध्यक्ष आणि केंद्रीय मंत्री आहेत. केंद्र सरकारच्या नियमांनुसार राष्ट्रपती, पंतप्रधान व राज्यपाल हे ‘व्हीआयपी’ गणले जातात. तरीही नड्डा कर्वे रस्त्याने पुढे कोथरुडकडे पक्षाच्या एका कार्यकर्त्यांच्या गणेश मंडळाच्या दर्शनासाठी जात असताना अचानकपणे संपूर्ण कर्वे रस्त्यावर कोणीही वाहन लावू नये व लावले असल्यास ते तत्काळ काढून घ्यावे, असा तोंडी आदेश कोथरूड आणि वाहतूक पोलिसांनी दिला. मुळात पूर्वकल्पना न देता अशा पद्धतीने कारवाई करणे हे नियमबाह्य आहे, असे मनसेचे प्रदेश सरचिटणीस आणि महाराष्ट्र नवनिर्माण जनाधिकार सेनेचे प्रदेशाध्यक्ष हेमंत संभूस यांनी अतिरिक्त पोलिस आयुक्त मनोज पाटील यांनी दिलेल्या निवेदनात म्हटले आहे.
-----------
पोलिसांना सूचना देणार
या बाबत अतिरिक्त पोलिस आयुक्त मनोज पाटील म्हणाले, ‘‘सुरक्षिततेच्या कारणास्तव पोलिसांनी पार्किंगमधील वाहने काढण्यास सांगितली असावीत. परंतु, तत्पूर्वी नागरिकांना विश्वासात घेऊन माहिती द्यायला हवी होती. तसेच थेट कारवाई करण्यापूर्वी पूर्वकल्पना देणे गरजेचे आहे. या बाबत संबंधित पोलिस अधिकारी आणि कर्मचाऱ्यांना सूचना दिल्या जातील.’’
----------------