पीएमपी प्रवासी महिलांकडील दीड लाखांचे दागिने चोरीला

पुणे, ता. २ : पीएमपीने प्रवास करत असलेल्या महिलांकडील दागिने चोरीच्या आणखी दोन घटना घडल्या आहेत. नगर रस्ता, विश्रांतवाडी, खडकी परिसरात या घटना घडल्या. चोरट्यांनी प्रवासी महिलांकडील दीड लाख रुपयांचे सोन्याचे दागिने चोरले.
शिवाजीनगर ते विश्रांतवाडी मार्गावर ३१ ऑगस्टला पीएमपी बसमधून प्रवास करणाऱ्या महिलेच्या हातातील ३० हजारांची सोन्याची बांगडी चोरट्यांनी कापून नेली. याबाबत एका ज्येष्ठ महिलेने विश्रांतवाडी पोलिस ठाण्यात फिर्याद दिली आहे. तक्रारदार मूळच्या सोलापूर जिल्ह्यातील अक्कलकोटच्या रहिवासी आहेत.
दुसऱ्या घटनेत नगर रस्त्यावर पीएमपी प्रवासी महिलेच्या गळ्यातील ७५ हजार रुपयांची सोनसाखळी चोरट्यांनी लांबविली. याबाबत एका ज्येष्ठ महिलेने येरवडा पोलिस ठाण्यात फिर्याद दिली आहे. तक्रारदार महिला चंदननगर भागातील विडी कामगार वसाहतीत राहायला आहेत. त्या ३१ ऑगस्टला दुपारी दोनच्या सुमारास पीएमपीने नगर रस्त्यावरून प्रवास करत होत्या. चोरट्यांनी त्यांच्या गळ्यातील सोनसाखळी लांबविली. पोलिस कर्मचारी विशाल निलख तपास करत आहेत.
तिसरी घटना वाकडेवाडीत घडली. वाकडेवाडी एसटी स्थानकासमोर थांब्यावर बसमध्ये प्रवेश करणाऱ्या महिलेच्या गळ्यातील ५६ हजार रुपयांचे सोन्याचे दागिने चोरले. याबाबत महिलेने खडकी पोलिस ठाण्यात फिर्याद दिली आहे. पोलिस कर्मचारी हेमंत वाघमारे तपास करत आहेत.

स्वारगेट स्थानकात मोबाईलची चोरी
स्वारगेट एसटी स्थानकात प्रवासी तरुणाचा मोबार्इल चोरट्यांनी हिसकावून नेला. याबाबत स्वारगेट पोलिस ठाण्यात फिर्याद दिली आहे. तक्रारदार बाहेरगावी निघाला होता. एसटी बसमध्ये प्रवेश करताना चोरट्यांनी तरुणाच्या हातातील मोबाईल हिसकावला व चोरटे फरार झाले.