छायाचित्र प्रदर्शनाचा पारितोषिक वितरण सोहळा

पुणे, ता. २ : गणेशोत्सवानिमित्त पुणे फेस्टिव्हल आणि पुणे श्रमिक पत्रकार संघाच्या संयुक्त विद्यमाने बालगंधर्व कलादालनात भरविण्यात आलेल्या तीन दिवसीय छायाचित्र प्रदर्शनाचा पारितोषिक वितरण सोहळा उत्साहात पार पडला.
या वेळी प्रमुख पाहुणे संमेलनाचे माजी अध्यक्ष डॉ. श्रीपाल सबनीस उपस्थित होते. शहरातील विविध वृत्तपत्रांतील ४५ छायाचित्रकारांनी टिपलेली ३०० छायाचित्रे या प्रदर्शनात प्रदर्शित केली होती. या प्रदर्शनाचे परीक्षण ज्येष्ठ छायाचित्रकार मिलिंद वाडेकर व सागर गोटखिंडीकर यांनी केले.
या स्पर्धेत ‘पुढारी’चे छायाचित्रकार अनंत टोले यांनी पहिले पारितोषिक पटकावले. ‘महाराष्ट्र टाइम्स’चे आशिष काळे यांना द्वितीय, तर ‘सकाळ’चे प्रमोद शेलार यांना तृतीय क्रमांक मिळाला. विजेत्यांना प्रमाणपत्र, पुणे फेस्टिव्हलची ट्रॉफी आणि अनुक्रमे ११ हजार, सात हजार व पाच हजार रुपयांची रोख रक्कम देण्यात आली. मान्यवरांच्या हस्ते या तिन्ही छायाचित्रकारांचा सन्मान करण्यात आला.
या कार्यक्रमाला फेस्टिव्हलचे उपाध्यक्ष कृष्णकुमार गोयल, मुख्य संयोजक अ‍ॅड. अभय छाजेड, अ‍ॅड. अंकुश काकडे, माजी महापौर प्रशांत जगताप, अरविंद शिंदे, चित्रकार मुरली लाहोटी, संघाचे अध्यक्ष ब्रिजमोहन पाटील, सरचिटणीस मंगेश फल्ले उपस्थित होते.